„Það getur verið hörkufjör í kringum fatlað fólk“

„Uppi­standið mitt er kannski ekki hefð­bundið að því leyti til að ég kem ekki til með að standa á svið­inu, það væri reyndar algjört krafta­verk ef það gerð­ist, svona ef út í það er farið,“ segir Dagur Steinn Elfu Ómarsson, sem fædd­ist með cp hreyfi­hömlun og er í hjóla­stól. „Daginn eftir uppi­standið mitt mun Sóli Hólm svo stíga á svið með sitt uppi­stand, þannig eigum við ekki bara að segja að ég sé að fara að hita upp fyrir hann, en ég er samt minna í eft­ir­hermum.“

Út af með dómarann 

Uppi­standið heitir ein­fald­lega „Út af með dóm­ar­ann“ og er eig­in­lega vísun í það að hann getur orðið alveg brjál­aður á íþrótta­leikjum og látið dóm­ar­ana heyra það all­hressi­lega, „oft­ast óverð­skuldað auð­vitað,“ segir Dagur Steinn og hlær. „Hin pæl­ingin með nafn­inu er sú að við höfum öll gott af því að hvíla dóm­ar­ann sem býr innra með okkur, þessum sem raðar fólki oft ósjálfrátt í ein­hverja flokka. Því það getur til dæmis bara alveg verið hörku­fjör í kringum fatlað fólk get ég sagt ykkur, og af hverju ætti það ekki að vera þannig? Í þessa einu kvöld­stund ætlum við að hvíla dóm­ar­ann og henda í geggjað fjör.“

„Við höfum öll gott af því að hvíla dóm­ar­ann sem býr innra með okkur“

Uppi­standið verður sam­an­suða af því sem honum þykir skemmti­legt og því sem hann hefur brallað í líf­inu. „Það er nefni­lega ansi margt, þrátt fyrir að ég sé ungur og í hjóla­stól. Þetta verður hressandi og gott pepp sem örugg­lega margir hafa gaman af og geta svo tekið með sér gleð­ina áfram út í kvöldið. Það verða auð­vitað fullt af vinum og kunn­ingjum í hús­inu en þetta er líka alveg eins fyrir þá sem þekkja mig minna eða hrein­lega ekki neitt.“

Það eru auð­vitað allir vel­komnir á uppi­standið mitt, en United-menn, Framarar, ÍR-ingar og Fjöln­is­menn eru auð­vitað sér­stak­lega vel­komnir. Ég mun horfa í gegnum fingur mér með fáeina Poolara, en þeir mega eiga von á því að fá á bauk­inn,“ segir hann og skellir upp úr. Aðspurður um ástæðu þess að hann hafi ákveðið að stíga á svið með uppi­stand, segir hann það til komið vegna áskor­unar. „Margir vina minna höfðu ekki séð fyr­ir­lestrana sem ég hef haldið í gegnum tíð­ina og hvöttu mig áfram til þess að vera með uppi­stand og safna saman bestu sög­unum og öllu rugl­inu. Þannig að ég ákvað bara að slá til og heyrði í snill­ing­unum í Bæj­ar­bíói sem leist svo frá­bær­lega á þetta brölt í mér.“

Mynd: Úr einka­safni

Dansaði fram á nótt 

Áður  hefur Dagur Steinn verið að halda fyr­ir­lestra um stöðu sína. Aðdrag­and­inn að því var að móðir hans var beðin um að halda erindi á ráð­stefnu fyrir nokkrum árum síðan, þar sem fjalla átti um mennta­mál. „Mamma stakk svo bara upp á því hvort ég myndi ekki bara taka að mér þennan fyr­ir­lestur, þar sem ég hafði búið í Danmörku og hafði reynslu af mis­mun­andi skóla­kerfum. Það er alltaf svo mikið af mömmum á svona fundum svo ég ákvað að plata pabba gamla með mér og við vorum saman feðgarnir með fyrsta fyr­ir­lest­ur­inn. Hann heppn­að­ist það vel að fólk var kom­andi til mín að honum loknum, segj­andi að þetta hafi verið meira eins og uppi­stand, en ég tek það fram að það var samt algör­lega óvart. Þarna var ég bara að segja fólk­inu hvað lífið sé skemmti­legt og að það sé eig­in­lega alltaf hægt að kjósa að líta á björtu hlið­arnar og hafa gaman af því.“

„Ég fékk mér nokkra ískalda og dans­aði svo fram eftir nóttu með ein­hverjum amer­ískum guggum“

Eftir það hefur hann haldið nokkra fyr­ir­lestra í svip­uðum dúr, meira að segja einn sem hald­inn var á ensku, á ráð­stefnu sem haldin var á Hilton Hótel. „Það besta við þann við­burð var samt auð­vitað gala-kvöldið í Perlunni þar sem ég fékk mér nokkra ískalda og dans­aði svo fram eftir nóttu með ein­hverjum amer­ískum guggum.“

Samansafn af snillingum 

Sem stendur er hann ekki far­inn að huga að fleiri uppi­stöndum, svo hann hvetur fólk til þess að rjúka af stað og tryggja sér miða í Bæjarbíó þann 13. nóv­em­ber. Stefnan er auð­vitað að fylla húsið og miða­salan hefur farið hörku­vel af stað og aðeins fáir miðar eftir.  „Meðal gesta verður stórt stuðn­ings­manna­gengi frá sum­ar­búð­unum í Reykja­dal, þannig að ég geri ráð fyrir frá­bærum sal og miklu fjöri. Ég er nefni­lega svo hepp­inn að eiga stóran hóp af vinum og stuðn­ings­fólki allt í kringum mig, sem er reyndar sam­an­safn af snill­ingum, sem gera allt betra. Eins ætla strák­arnir í meist­ara­flokki í Fram í hand­bolt­anum að fjöl­menna á uppi­standið.

Til að krydda við­burð­inn enn frekar mun ég frum­flytja á uppi­stand­inu glæ­nýtt stuðn­ings­manna­lag fyrir lands­liðið í fót­bolta sem ég er að klára með nokkrum snill­ingum sem kunna aldeilis að rappa og búa til beat. Lands­liðið er einmitt að spila við Tyrkland dag­inn eftir uppi­standið þannig að ég verð svo að koma lag­inu út til strák­anna.“

Spennandi tímar fram undan

Aðspurður hvað sé fram undan seg­ist Dagur Steinn reyna að horfa pass­lega langt fram í tím­ann. „Ég held að það sé skyn­sam­leg­ast. Það næsta stóra hjá mér er þó tví­tugs­af­mælið mitt í des­em­ber, en þá er stefnan tekin á flösku­borð á B5.“

Mynd: Úr einka­safni

Bolta­í­þrótt­irnar eiga ann­ars hug og hjarta Dags Steins sem hvetur sína menn, bæði hér heima og þvert yfir lönd og höf þegar þannig ber undir. „Svo er auð­vitað EM í hand­bolta í jan­úar og ég ætla að kíkja þangað. Ekki má gleyma snill­ing­unum okkar í fót­bolt­anum. Við höfum auð­vitað fulla trú á þeim og það yrði nú alveg frá­bært að kom­ast inn á EM næsta sumar, ég bara veit að þeir eiga svo eftir að klára þetta. Mér þykir nefni­lega lang­skemmti­leg­ast að elta lands­liðin okkar, það toppar það nákvæm­lega ekki neitt. En ég fór á EM í fót­bolta og sá Ísland vinna bæði Aust­ur­ríki og England, það var ansi eft­ir­minni­legt. Eins sá ég leik­inn við Nígeríu í Vol­gograd á HM og kíkti auð­vitað á stelp­urnar á EM í Hollandi. Þá fór ég líka til Þýska­lands að sjá hand­bolta­strák­ana okkar og mun auð­vitað ekki láta mig vanta á næsta mót hjá þeim í Svíþjóð.“ 

Annars er hann að reyna að kom­ast inn í NPA-prógram­mið hjá Reykja­vík­ur­borg, sem gerir fólki kleift að ráða því sjálft hvar það býr, með hverjum og móta sinn eigin lífs­stíl. Þeir sem fá not­enda­mið­aða per­sónu­lega aðstoð geta þannig stýrt því sjálfir hvernig aðstoðin er skipu­lögð, við hvað þeir fá aðstoð, hvar, hvenær og hver veitir hana. „Reykja­vík­ur­borg mætti að mínu mati mætti fara að gyrða í brók og græja NPA bæði fyrir mig og fleira fólk í minni stöðu svo hægt sé að lifa sjálf­stæðu og skemmti­legu lífi. Vonandi tekst það fyrr en seinna. Annars ætla ég bara að njóta lífs­ins áfram, mæta á leiki, elta lands­liðið okkar og halda áfram að rífa kjaft.“

Eitthvað að lokum? „Jú jú, í sturtu með dóm­ar­ann! og áfram Man United!“

Uppi­standið „Út af með dóm­ar­ann“ verður í Bæj­ar­bíói þann 13. nóv­em­ber. Miðasala á við­burð­inn fer fram á midi.is.