Það er ekkert nýtt að kjósendur efist um heilindi kjörinna fulltrúa en segja má að umræðan um lygar þeirra hafi náð ákveðnu hámarki undanfarin ár. Donald Trump Bandaríkjaforseti er auðvitað þekktur fyrir að fara frjálslega með staðreyndir svo ekki sé meira sagt. Öll Brexit-herferðin í Bretlandi er í dag sögð hafa verið byggð á lygum og stjórnmálamenn á borð við Boris Johnson verið dregnir fyrir dómstóla fyrir vikið. Á Íslandi fullyrða þingmenn fullum fetum að þeir hafi verið að spauga þegar þeir náðust á upptöku ræða pólitísk hrossakaup og dreifa óhróðri um kollega sína. Selahljóð væru líklega komin frá hjólreiðamönnum inni á knæpu.

Dæmin eru ótal mörg en rauði þráðurinn er að sannleikurinn er orðinn afstæður í stjórnmálum og menn taka sér fullan rétt til að túlka staðreyndir eftir eigin höfði eins og um skoðanir væri að ræða. Deilurnar um hversu margir voru viðstaddir embættistöku Trumps forseta eru gott dæmi. …