Af 25 opinberum útboðum vegna ræstinga árið 2017 var fyrirtækið ISS Ísland ehf. 19 sinnum með lægsta verðtilboðið, eða í 76 prósentum tilvika. Í 12 skipti var meira en 30 prósenta munur á verðtilboði ISS og næstlægsta tilboðinu og fimm sinnum var munurinn yfir 60 prósentum.
„Þetta snýst ekki um að fólk sé látið hlaupa hraðar. ISS hefur einfaldlega með góðu verkskipulagi náð að skipuleggja verkframkvæmd, kennslu og þjálfun þannig að starfsemin er markvissari en áður,“ segir Guðmundur Guðmundsson, forstjóri fyrirtækisins, sem er í algjörri yfirburðastöðu á íslenskum ræstingamarkaði, með rúmlega 46 prósenta markaðshlutdeild og veltu sem er þreföld á við veltu þess keppinautar sem næst kemur að stærð.
Heildarvirði samninga sem hið opinbera gerði við ISS á tímabilinu 2014 til 2017 nemur um 540 milljónum króna og nú í janúar landaði ISS rúmlega 150 milljóna samningi um ræstingar í helstu byggingum Landspítalans við Hringbraut.
Gríðarleg framleiðniaukning
ISS Ísland var alfarið í eigu danska fyrirtækisins ISS Facility Services A/S þar til í lok ársins 2016 þegar tilkynnt var að hópur innlendra og erlendra fjárfesta hefði undirritað samning um kaup á öllu hlutafé ISS Ísland. Félagið Sandur ehf. var stofnað um kaupin, en að þeim stóðu Benedikt Sveinsson og Einar Sveinsson, faðir og föðurbróðir Bjarna Benediktssonar fjármálaráðherra, auk erlendra fjárfesta og stjórnenda félagsins.
Frá því að eigendaskiptin áttu sér stað hefur munurinn á lægsta tilboði ISS og næstlægsta tilboði keppinauta í útboðum tekið kipp upp á við svo eftir hefur verið tekið. Dæmi eru um að ISS bjóði miklu lægra verð en kostnaðaráætlanir verkkaupa gera ráð fyrir. Þegar Ríkiskaup bauð út ræstingar á Kleppi fyrir Landspítalann í nóvember 2017 var til dæmis miðað við að verkið myndi kosta um 23,8 milljónir en ISS bauð 16,9 milljónir. Samkeppnisaðilar hafa klórað sér í kollinum yfir hinum lágu verðtilboðum, ekki síst í ljósi þess að vinnuaðstæður og kjör starfsmanna ISS þykja ekki verri en almennt tíðkast í ræstingageiranum.
Athugasemdir