Ráðstöfunartekjur íslenskra heimila, það er þær tekjur sem standa eftir þegar búið er að draga frá skatta og taka tillit til bóta og annarra tilfærslna, jukust um 6,8 prósent árið 2025 samkvæmt bráðabirgðatölum Hagstofunnar.

Að teknu tilliti til verðlagsþróunar nam aukning kaupmáttar ráðstöfunartekna á mann, sem mælir hversu mikið er hægt að kaupa fyrir tekjurnar, þó aðeins 1,2 prósentum á árinu.

Kaupmáttaraukning ráðstöfunartekna hefur aðeins einu sinni verið minni á síðustu tíu árum.

Mest fer upp í verðbólgu

Ráðstöfunartekjur á mann, sem sýna hversu háar tekjurnar eru að jafnaði á hvern íbúa, námu rúmlega 6,4 milljónum króna og jukust um 5,4 prósent milli ára. Á sama tíma hækkaði vísitala neysluverðs, sem mælikvarði verðbólgu, um 4,1 prósent.

Stór hluti tekjuaukningarinnar fór því í að mæta verðhækkunum.

Heildartekjur heimilanna, sem eru allar tekjur áður en skattar og tilfærslur eru teknar með í reikninginn, jukust um 7,3 prósent á árinu og …