Ísland mun ekki taka þátt í Eurovision á næsta ári. Þetta var tilkynnt eftir fund stjórnar RÚV núna síðdegis. Síðasti dagur til að staðfesta þátttöku í keppninni var í dag.
„Ljóst er miðað við opinbera umræðu hér á landi og viðbrögð við ákvörðun EBU sem tekin var í síðustu viku að hvorki mun ríkja gleði né friður um þátttöku RÚV í Eurovision. Það er því niðurstaða RÚV að tilkynna EBU um það í dag að RÚV taki ekki þátt í Eurovision á næsta ári,“ segir í fréttatilkynningu frá RÚV. Ekki liggur fyrir hvort haldin verði söngvakeppni á næsta ári.
„Fyrir mína hönd segi ég: Til hamingju Ísland,“ sagði Stefán Jón Hafstein, stjórnarformaður RÚV, að fundinum loknum. Að hans mati væri niðurstaðan farsæl.
Til stóð að stjórnin myndi kjósa um þátttökuna, en ekki kom til atkvæðagreiðslu, þar sem útvarpsstjóri kynnti stjórn að framkvæmdastjórn RÚV hefði ákveðið að taka ekki þátt.
Dagskrárlegar forsendur
Útvarpsstjóri skýrði að ákvörðunin hefið verið tekin á dagskrárlegum forsendum. Þegar viðburður vekur ekki gleði og sameinar ekki þjóðina lengur sé ástæða til að hugsa sinn gang. „Það er augljóst að þessi keppni er ekki að sameina okkur með sama hætti og verið hefur undanfarin ár af ástæðum sem blasa við öllum og þess vegna er þessi ákvörðun tekin.“ Í henni fælust ekki pólitísk skilaboð af hálfu RÚV.
Stjórnarformaður RÚV sagði aðspurður að það hefði „alls ekki“ verið einhugur meðal stjórnarmanna um þessa niðurstöðu. „En hún fékkst og það var alveg nægur meirihluti fyrir því innan stjórnarinnar að afturkalla þátttöku í Eurovision.“
Eurovision verður enn send út, sem og atriði Ísraels. „Við erum ekki í neinni ritskoðun hér,“ segir útvarpsstjóri.
Alvarlegar athugasemdir við morð á fréttamönnum
Grunnur ákvörðunarinnar er staðan á Íslandi. „Það er erfitt að fá listamenn til þátttöku í þessu verkefni,“ sagði útvarpsstjóri. Hann hefði enn fremur komið því á framfæri við Samband evrópskra sjónvarpsstöðva (EBU) að framferði Ísraelsmanna á Gaza gagnvart fjölmiðlamönnum væri með þeim hætti að ekki væri annað hægt en að gera mjög alvarlegar athugasemdir. „Það er eitthvað sem við getum gert og beitt okkur fyrir á vettvangi EBU í þessu samhengi og það höfum við gert.“
Stefán Jón greip þá keflið og sagði að um fjölmiðlapólitíska stefnumótun væri að ræða. „Sem felst í því að mótmæla því að eitt aðildarríki beiti fréttabanni, ritskoðun og morðum á fréttamönnum. Það eru aðferðir sem EBU eiga ekki að líða þátttökuríki.“ Þrátt fyrir að átökunum hefði linnt á Gazasvæðinu væri það enn ótrúlega slæmt. „Þetta er ekki vopnahlé í þeim skilningi sem við höfum.“
Áður en fundurinn hófst sagði Stefán Jón Hafstein, stjórnarformaður RÚV, að hann legði til að Ísland tæki ekki þátt ef Ísrael yrði með og að hann ætti von á góðri niðurstöðu fyrir Ísland. Diljá Ámundadóttir Zöega, varaformaður stjórnar, sagði einnig fyrir fundinn að hún vonaðist til þess að Ísland tæki ekki þátt í keppninni.
Hávær krafa hefur verið um að Ísland dragi sig úr þátttöku í Eurovision æ síðan Ísrael réðst inn á Gaza undir lok árs 2023. Fjöldi mótmælenda var saman kominn fyrir utan RÚV áður en stjórnin fundaði til að hvetja til sniðgöngu keppninnar.
Logi Einarsson, menningar-, nýsköpunar- og háskólaráðherra, sagði fyrr í vikunni að hann teldi rétt að sniðganga Eurovision í ljósi þátttöku Ísraels.
Fleiri lönd sniðganga
Fulltrúar evrópskra sjónvarpsstöðva samþykktu að leyfa Ísraelum að taka þátt í keppninni á næsta ári sem verður haldin í Vín í Austurríki. Í kjölfarið tilkynntu nokkur lönd að þau hygðust ekki taka þátt í keppninni. Þar á meðal eru Holland, Spánn, Írland og Slóvenía. Belgía hafði áður tilkynnt að hún ætlaði ekki að taka þátt ef Ísrael yrði leyft að keppa en ríkissjónvarp landsins sneri ákvörðuninni.
Þetta er síður en svo í fyrsta skipti sem kallað er eftir sniðgöngu Eurovision vegna þátttöku tiltekinna þjóða, líkt og Guardian fjallaði um á dögunum.
Það var Spánn sem var tilefnið að fyrsta sniðgöngukallinu í sögu keppninnar. Eftir að Spánn sigraði keppnina árið 1968 og hélt hana árið eftir var kallað eftir því að hún yrði sniðgengin vegna stjórnar Franco á landinu.
Fréttin hefur verið uppfærð.
Athugasemdir (1)