„Sveitarfélögin hafa haldið úti heilbrigðiseftirliti síðastliðin 124 ár. Lögbundið hlutverk heilbrigðiseftirlits, að standa vörð um heilnæmi umhverfis fyrir íbúa sína, virðist ekki vera haft að leiðarljósi í núverandi tillögum,“ segir Pétur Halldórsson, heilbrigðisfulltrúi og gjaldkeri Félags heilbrigðis- og umhverfisfulltrúa (FHU) um breytingar á eftirlitsumhverfi fyrirtækja sem ráðherrar ríkisstjórnarinnar kynntu í vikunni.

Hann segir tillögur ríkisstjórnarinnar „sýna mikið skilningsleysi á málaflokknum og þeim fjölbreyttu verkefnum sem heilbrigðiseftirlit sinnir“.

Breytingarnar snerta eftirlitsumhverfi fyrirtækja þegar kemur að mat­væl­um, holl­ustu­hátt­um og meng­un­ar­vörn­um. Hanna Katrín Friðriksson atvinnuvegaráðherra sagði af þessu tilefni: „Við erum að einfalda regluverkið og gera eftirlit með matvælum, hollustuháttum og mengunarvörnum traustara og skilvirkara með hagsmuni atvinnulífsins og neytenda að leiðarljósi”.  Jóhann Páll Jóhannsson umhverfis-, orku- og loftslagsráðherra, sagði þetta stærstu breytingu á eftirlitsumhverfi fyrirtækja sem ráðist hafi verið í svo áratugum skipti. 

FHU sendi í framhaldinu frá sér yfirlýsingu þar sem segir að fundurinn hafi verið haldinn „undir yfirskini einföldunar á regluverki“ en „raungerist tillagan hafi það hvorki einföldun eftirlits né fækkun eftirlitsaðila í för með sér. Aðilar sem í dag fá eftirlit heilbrigðiseftirlits sem staðsett er í þeirra heimabyggð munu framvegis lúta eftirliti tveggja ríkisstofnana.“

Skorti samráð við sérfræðinga

Þá vill FHU „ítreka mikilvægi þess að áform um kerfisbreytingar af þessu tagi séu vel ígrunduð og nauðsyn þess að haft sé samráð við sérfræðinga í heilbrigðiseftirliti.“

Félag heilbrigðis- og umhverfisfulltrúa leggst gegn tillögunni og vill ítreka mikilvægi þess að áform um kerfisbreytingar af þessu tagi séu vel ígrunduð og nauðsyn þess að haft sé samráð við sérfræðinga í heilbrigðiseftirliti. Þá segir að kynnt einföldun virðist einblína fyrst og fremst á leyfisskylda starfsemi en ekki heilbrigðiseftirlit almennt. 

„Líklegt er að eftirlit frá tveimur stofnunum myndi auka kostnað hjá rekstaraðilum, skilvirkni eftirlits myndi minnka og hætt við að hagsmunir almennings muni gleymast en heilbrigðiseftirlit sveitarfélaga hefur gegnum tíðina verið öflugur málsvari hins almenna borgara,“ segir í tilkynningu FHU sem hvetur ráðuneytin til að endurskoða áform sín.