Dómsmálayfirvöld í Noregi hafa samþykkt að framselja mann sem er eftirlýstur af yfirvöldum í Rúanda vegna meintrar þátttöku hans í þjóðarmorðinu sem þar átti sér stað árið 1994.

Það ár voru um 800 þúsund Tútsar og andstæðingar þjóðarmorðsins úr hópi Hútúa drepnir á 100 dögum í þjóðarmorði sem hófst eftir að forseti Rúanda, Juvenal Habyarimana, var myrtur.

Maðurinn, sem ekki hefur verið nafngreindur, var handtekinn í október 2022 af glæparannsóknardeild norsku lögreglunnar, Kripos. Samkvæmt yfirlýsingu Kripos var maðurinn eftirlýstur fyrir að „hafa framið morð í þjóðarmorðinu árið 1994.“

Héraðsdómur í Ósló úrskurðaði í september 2023 að skilyrði fyrir framsali væru uppfyllt, og var sá dómur staðfestur af áfrýjunardómstól í apríl 2024. Maðurinn áfrýjaði þá til Hæstaréttar Noregs sem hafnaði beiðninni í júní á síðasta ári.

Eftir að allar lagalegar leiðir hans höfðu verið tæmdar, ákvað dómsmálaráðuneytið í febrúar að framsal gæti farið fram, og var sú ákvörðun að lokum staðfest af Ríkisráðinu.

„Sá ákærði verður nú framseldur til Rúanda, þar sem hann verður dreginn fyrir dóm fyrir þátttöku í þjóðarmorðinu,“ sagði lögreglufulltrúinn Thea Elise Kjaeraas í yfirlýsingu.

Norsk yfirvöld hafa á síðustu árum tekið við fjölda beiðna um framsal vegna þjóðarmorðs og er eitt af um sex vestrænum löndum þar sem dómstólar hafa fellt dóma í slíkum málum frá árinu 2009.