Rétt rúm 40 prósent þeirra sem segjast ætla að kjósa Miðflokkinn í nýjustu skoðanakönnun Maskínu, segja að þau hafi kosið Sjálfstæðisflokkinn í Alþingiskosningunum árið 2021. 

Þetta kemur fram í mælingum sem könnunarfyrirtækið hefur gert aðgengilegar á sérstöku mælaborði á vef sínum, sem byggir á svörum við nýjustu könnun fyrirtækisins, sem birt var 28. október.

Þar er hægt að sjá bæði hvaðan fylgi einstaka flokka er og hvert fylgi flokka hefur færst frá síðustu kosningum, miðað við svörin sem Maskína fékk frá þátttakendum í könnuninni. 

Yfirlit sem þetta hefur ekki verið birt opinberlega samfara birtingu skoðanakannanna til þessa, nú í aðdraganda kosninga, og veitir greining Maskínu því nýja innsýn í það hvernig fylgið virðist hafa hreyfst á milli flokkanna.

Framsóknarfylgið frá 2021 er ekki bara hjá Samfylkingu

Í umræðum um fylgi flokkanna síðustu misseri hefur stundum verið nefnt að fylgið sem sópaðist á Framsóknarflokkinn í síðustu kosningum og skóp kosningasigur flokksins undir slagorðinu Er ekki bara best að kjósa Framsókn? gæti hafa leitað til Samfylkingar eftir því liðið hefur á kjörtímabilið og skýrt stóran hluta þeirra fylgisaukningar sem Samfylkingin hefur notið.

Samkvæmt niðurbrotinu á könnun Maskínu er það þó ekki tilfellið, heldur kvarnast kjörfylgi Framsóknar frá 2021 aðallega niður á þrjá flokka; Miðflokkinn sem hefur hrifsað til sín um 20 prósent kjósenda Framsóknar og svo Samfylkingu og Viðreisn, en hvor hreyfing um hefur náð til sín um 15 prósentum kjósenda Framsóknarflokksins frá 2021, samkvæmt niðurstöðum Maskínu.

Mynd: Maskína

Ef horft er á það hvaða flokk kjósendur Framsóknarflokksins frá 2021 segjast ætla að kjósa nú má sjá að einungis 33 prósent þeirra segjast ætla að kjósa Framsókn aftur. Einungis Vinstri grænum og Pírötum hefur haldist verr á kjósendum sínum frá 2021, en aðeins 21 prósent kjósenda VG segjast ætla að kjósa flokkinn á nýjan leik og rúm 30 prósent kjósenda Pírata.

Hærra hlutfall kjósenda beggja flokka frá 2021 segjast nú ætla að kjósa Samfylkinguna en þessa tvo flokka, samkvæmt könnun Maskínu. Á hinum endanum eru Miðflokkurinn, Viðreisn og Samfylkingin, sem halda vel í kjósendahópa sína frá 2021.

Mynd: Heimild / Maskína

Kjósendur Pírata og VG flykkjast á Samfylkingu

Samfylkingin hefur mælst stærsti flokkur landsins í skoðanakönnunum um lengri tíma og í nýjustu könnun Maskínu er fylgið 22,2 prósent. En hvað kaus kjósendahópur Samfylkingarinnar síðast? Rúm 42 prósent kusu Samfylkinguna.

Mynd: Maskína

Stærstu hóparnir sem hafa fært sig yfir á Samfylkinguna kusu Pírata og Vinstri græn síðast, en samanlagt tæp 32 prósent væntra kjósenda flokksins kaus annan hvorn þessara flokka síðast. Tæp 10 prósent þeirra sem segjast ætla að kjósa Samfylkinguna í þessari könnun Maskínu segjast hafa kosið Framsóknarflokkinn árið 2021. 

Ef við horfum á dæmið frá hinni hliðinni og sjáum hvert fylgi Pírata og Vinstri grænna virðist vera að fara þá segjast alls helmingur kjósenda Pírata frá 2021 ætla að kjósa ýmist Samfylkinguna eða Viðreisn.

Mynd: Maskína

Kjósendur VG frá 2021 eru einnig líklegastir til þess að hafa fært sig á þessa tvo flokka, tæp 29 prósent á Samfylkinguna og rúm 13 prósent á Viðreisn.

Sjálfstæðisflokkurinn sækir nær enga nýja

Það þarf ef til vill ekki að koma á óvart miðað við stöðu flokksins og nær helmingað fylgi frá síðustu kosningum, en samkvæmt niðurstöðum Maskínu sækir Sjálfstæðisflokkurinn nær ekkert nýtt fylgi frá öðrum flokkum. Heil 88 prósent þeirra sem segjast ætla að kjósa flokkinn nú segjast hafa kosið flokkinn síðast líka. 

Mynd: Maskína

Einungis 26 manns sem svara könnuninni og segjast ætla að kjósa Sjálfstæðisflokkinn kusu einhverja aðra flokka síðast. Þar af kusu 18 ýmist Framsókn eða Vinstri græn, samstarfsflokka Sjálfstæðisflokksins. 

Af kjósendum Sjálfstæðisflokksins árið 2021 eru 26 prósent farin yfir á Miðflokkinn, tæp 8 prósent á Viðreisn, um 5 prósent á Samfylkingu en færri yfir á aðra flokka. 

Viðreisn sækir svipað í margar áttir

Þegar horft er á hvaðan fylgi Viðreisnar er að koma sést að 44 prósent þeirra sem segjast ætla að kjósa flokkinn nú segjast einnig hafa kosið hann árið 2021.

Mynd: Maskína

Viðreisn sækir hins vegar nokkuð jafnt til annarra flokka, en rúmur þriðjungur kjósenda hans kemur úr mengi þeirra sem kusu stjórnarflokkana þrjá í síðustu kosningum – á bilinu 10-13 prósent hjá hverjum þeirra. Hartnært 10 prósent væntra kjósenda Viðreisnar kusu svo Samfylkinguna og litlu færri, eða 8 prósent, Pírata.