Vigdís Häsler, er sátt við lífið og tilveruna, sjö mánuðum eftir að stjórn Bændasamtakanna tilkynnti henni að krafta hennar væri ekki óskað lengur þar. Hún segist stolt af því sem hún og samstarfsfólk hennar komu til leiðar hjá samtökunum. Þau hafi lyft grettistaki í mörgum málum sem hafi legið óbætt hjá garði lengi.
Vigdís greindi frá því á Facebook 8. apríl síðastliðinn að hún væri að hætta hjá Bændasamtökunum en hún var ráðin framkvæmdastjóri Bændasamtakanna, fyrst kvenna, í byrjun árs 2021.
„Samstarfskonur mínar sögðu stundum bæði í gríni og alvöru; jæja, ertu að fara á fund með mönnunum,“ segir Vigdís en hún gegndi starfinu í þrjú ár. Margrét Ágústa Sigurðardóttir er nú framkvæmdastjóri samtakanna.
„Stóðu ofboðslega óstyrkum fótum fjárhaglega“
Vigdís mætti til starfa í Bændahöllinni við Hagatorg í febrúar árið 2021. Hún segist hafa hlakkað til að vera talskona bænda. Fljótlega hafi þó komið á daginn að það yrði ekki …
Mér svelgdist einfaldlega á kaffinu við það að lesa þetta viðtal við fyrrum forsvarsmann Bændasamtakanna. Höfum það alveg á hreinu að pólitíkin var aldrei langt undan þegar hún var þar í forsvari.
Nærtækt að taka sem dæmi að hún neitaði með öllu að álykta um sjókvíaeldismál, þrátt fyrir að skjólstæðingar hennar ættu mest undir í verndun íslenskra laxastofna, en um 3000 lögbýli í landinu fá arð af veiðirétti. Hún fylgdi einfaldlega þeirri pólitísku línu sem hún átti að fylgja, án þess að hugsa um sína skjólstæðinga.
Og hvar skyldi Vigdís annars vera komin í vinnu núna?
Jú mikið rétt - hún var að hefja störf hjá Kleifum laxeldi.