Lands­réttur hefur stað­fest úrskurð hér­aðs­dóms Reykja­ness um gæslu­varð­hald yfir karl­manni sem grun­aður er um man­sal, skjala­fals og skipu­lagt smygl á fólki til Íslands. 

Vika er síðan mað­ur­inn var úrskurð­aður í gæslu­varð­hald, og ein­angrun, að kröfu lög­reglu­stjór­ans á Suð­ur­nesjum.

Í úrskur­inum segir að lög­regla telji að mað­ur­inn sé „vís­vit­andi og með skipu­lögðum hætti að blekkja íslensk stjórn­völd og gefa upp rangar upp­lýs­ingar í því skyni að fá dval­ar­leyfi fyrir aðila á fölskum for­sendum og e.a. hag­nýta sér þau í man­sali og hagn­ist á því. Þá er það einnig grunur lög­reglu að varn­ar­að­ili standi ekki einn að verki heldur njóti lið­sinnis, sam­starfs og e.a. sam­vinnu ann­arra aðila.“

Sögðust komnar að hitta föður sinn

Þann 4. júlí 2023 tók lög­regla til skoð­unar tvo flug­far­þega sem höfðu komið til lands­ins með flugi. Um var að ræða ungar konur sem sögð­ust báðar vera undir 18 ára aldri og að þær væru komnar hingað til lands til að hitta föður sinn sem ætti heima á Íslandi, en umræddur maður er sá sem er í varð­haldi. 

Við upp­flett­ingu í kerfum lög­reglu kom í ljós að þeim hafði verið veitt dval­ar­leyfi sem barn íslend­ings sem jafn­framt er skráður faðir þeirra í kerfum íslenskra stjórn­valda. Þær sögðu vin föður þeirra vera kom­inn í flug­stöð­ina að sækja þær og gáfu upp síma­númer hans. Lögregla stað­festi að það síma­númer væri skráð á þann aðila en sá er með ótíma­bundið dval­ar­leyfi á Íslandi.

Samkvæmt fyr­ir­liggj­andi gögnum barn­verndar Suð­ur­nesja­bæjar dvöldu stúlk­urnar í úrræði á þeirra vegum í nokkra daga fyrir fylgd­ar­laus börn. Þegar ætl­aður faðir kom til lands­ins voru stúlk­urnar sam­ein­aðar honum.

Stúlkurnar taldar búa við slæmar aðstæður

Í gæslu­varð­halds­úr­skurð­inum kemur fram að lög­regla hefur rök­studdan grun til að ætla að stúlk­urnar búi við slæmar aðstæður. Þá liggur fyrir að önnur stúlkan er barns­haf­andi en óvíst er hver  fað­ir­inn er. Einnig liggur fyrir að hin  stúlkan er HIVsmituð og móðir drengs sem hún kemst ekki í sam­band við nema í gegn um mann­inn sem hún sagði vera faðir sinn og situr í gæslu­varð­haldi. 

Að kröfu Útlend­inga­stofn­unar  und­ir­geng­ust stúlk­urnar og varn­ar­að­ili DNA rann­sókn sem leiddi í ljós að hann er ekki faðir þeirra líkt og hann hefur haldið fram og dval­ar­leyfi þeirra grund­vall­ast á. Skjöl sem stað­festa  þessa  nið­ur­stöðu, áður  en dval­ar­leyfi fyrir þær var gefið út, sem og skjöl sem sýna að  mað­ur­inn  hafi  vitað  að  hann  væri  ekki  faðir  þeirra,  fund­ust við hús­leit hjá mann­inum.

Í grein­ar­gerð lög­reglu­stjóra með gæslu­varð­halds­kröf­unni segir að rann­sókn máls­ins sé í fullum gangi og miði ágæt­lega, en hún sé mjög umfangs­mikil. 

Lög­reglu­stjór­inn á Suð­ur­nesjum telur að mað­ur­inn muni tor­velda rann­sókn máls­ins, svo sem með því að afmá merki eftir brot, skjóta undan munum ellegar hafa áhrif á sam­seka eða vitni gangi hann laus.