Konur sem synda reglulega í köldu vatni segjast finna mikinn mun til hins betra á bæði líkamlegum og andlegum einkennum breytingaskeiðs, að því er rannsókn sem vísindamenn við University College í London gerðu og birt var í vísindatímaritinu Post Repruductive Health í upphafi árs. 1.114 konur tóku þátt í rannsókninni og 785 þeirra voru á breytingaskeiði. Tilgangur rannsóknarinnar var að kanna áhrif þess að synda í köldu vatni á heilsu kvenna og lífsgæði.
„Kalt vatn er undursamlegt. Það hefur bjargað lífi mínu“
Þær konur sem voru á breytingaskeiði sögðust finna minna fyrir kvíða (46,9%), sveiflum í líðan (34,5%) og hitakófum (30,3%) við það að synda í köldu vatni. Meirihluti kvennanna sagðist raunar synda við þessar aðstæður til þess einmitt að draga úr neikvæðum einkennum breytingaskeiðs en þau geta verið fjölmörg og haft mikil áhrif á lífsgæði. Sumar kvennanna sögðu að kalda vatnið drægi þegar í stað úr streitu og kvíða og sögðu sundið hafa græðandi áhrif á þær.
Ein kona, 57 ára, sagði: „Kalt vatn er undursamlegt. Það hefur bjargað lífi mínu. Í vatninu, þá get ég gert hvað sem er. Öll einkenni, líkamleg og andleg, hverfa og mér líður eins vel og hugsast getur.“
Joyce Harper, prófessor og sérfræðingur í kvenheilsu, er aðalhöfundur rannsóknarinnar. Hún bendir á að því hafi lengi verið haldið fram að það að synda í köldu vatn geti haft jákvæð áhrif á skap fólks og dregið úr streitu. Þá nefnir hún ennfremur að köld böð hafi lengi verið notuð við endurheimt hjá íþróttafólki.
„Rannsókn okkar styður við þessar fullyrðingar,“ segir hún. Niðurstöðurnar sýni að konur geti notað sund í köldu vatni til að létta á einkennum breytingaskeiðs, m.a. hitakófum og verkjum. „Það þurfa að fara fram frekari rannsóknir,“ bætir hún þó við, sérstaklega þegar komi að því hversu oft, hversu lengi og þar fram eftir götunum þurfi að vera í köldu vatni til að ná fram þeim ávinningi sem þátttakendur í rannsókninni lýstu. „Engu að síður þá vonum við að niðurstöður okkar geti gefið konum valkost, konum sem eiga erfitt á breytingaskeiði og hvatt þær til að stunda hreyfingu.“
![](https://heimildin.is/media/uploads/images/thumbs/uQecyTlLjbUy_200x904_oscRAdpy.png)
Harper segir að konurnar hafi flestar synt í köldu vatni til að létta á kvíða, skapsveiflum og hitakófum. Þær sögðust hafa fundið að slíkt sund hjálpaði frekar en sund í heitara vatni. Sundið sjálft væri ekki eini ávinningurinn því það að vera úti í náttúrunni og í félagsskap annarra, tilheyra samfélagi sem sameinast um áhugamál, hefði einnig góð áhrif.
Vísindamennirnir vilja þó minna á að ákveðin áhætta fylgi því að synda í köldu vatni og ekki mælt með því að stinga sér til sunds hvar sem er og við hvaða aðstæður sem er. Mengun vegna skolps í ám og sjó eru meðal þess sem varað er við í Bretlandi til dæmis. Þá þurfi að venja líkamann við kuldann smám saman áður en synt er af stað.
Rannsóknin er birt með ákveðnum fyrirvara. Um er að ræða rannsókn sem auglýst var á samfélagsmiðlum á tveggja mánaða tímabili. Einhver skekkja er sögð kunna að vera í niðurstöðunum þar sem rannsóknin var byggð á svörum kvenna sem þegar synda reglulega í köldu vatni. Þá er ennfremur líklegra konur sem hafa upplifað tengsl milli þess að synda í kvöldu vatni og einkenna breytingaskeiðsins hafi svarað könnuninni.
Athugasemdir