Ívar Aron Hill, sem á að baki langan brotaferil, hefur verið dæmdur á ný, nú í tveggja ára fangelsi og til þess að greiða um tæplega 1,4 milljónir í miskabætur fyrir sérstaklega hættulega líkamsárás og tilraun til ráns. Dómurinn var kveðinn upp þann 8. febrúar í Héraðsdómi Reykjaness og var fallist á flesta ákæruliði. 

Auk líkamsárásarinnar var Ívar ákærður fyrir margvísleg auðgunarbrot, vörslu fíkniefna og ítrekaðan akstur án ökuréttinda og undir áhrifum vímuefna. Fyrir rétti játaði Ívar játaði brotin, sem framin voru á árunum 2022 til 2023.  

Sérstaklega hættuleg líkamsárás

Það var þann 14. september 2022 sem Ívar gerði tilraun til þess að ræna hjóli og heyrnartólum af manni, skammt frá Reykjanesbraut, norðan við Bústaðaveg. Ívar var vopnaður hnífi. Áður en yfir lauk hafði brotaþoli verið stunginn þrisvar, einu sinni í mjöðm og tvisvar læri. 

Er því lýst að stungusárin sem brotþoli hlaut í ránstilrauninni hafi valdið brotaþola miklum miska, þar á meðal hafi blætt úr slagæð, auk þess sem hluti lærvöðva hans hafi farið í sundur.

Langur brotaferill

Í niðurstöðum dómsins kemur fram að Ívar eigi að baki langan brotaferil og verið ítrekað gerð refsing fyrir ýmis lögbrot. Fresta hafi þurft dómsmálinu vegna þess að hann hafi ekki sinnt boðunum á dómþing, á meðan hann var „týndur erlendis,“ og að lögregla þurft að beita sér fyrir því að fá ákærða fyrir dóm. 

Í frétt sem birt var á DV í ágúst í fyrra var fjallað um leitina að Ívari, en ástvinir hans höfðu ekki náð neinu sambandi við hann og lýstu áhyggjum af afdrifum hans. Ívar var þá staddur í Torrevieja á Spáni. Að lokum fannst hann þegar Ívar lét föður sinn vita að hann hefði verið staddur á sjúkrahúsi. Í millitíðinni hafði fjölskylda Ívars hafði óskað eftir aðstoð utanríkisráðuneytisins og Íslendingasamfélagsins á Spáni við leitina að Ívari.

Í dóminum var langur brotaferill og tafir á dómsmálinu vegna fjarvistar Ívars talin fram til refsiþyngingar. Hins vegar var litið til játningar hans og þess að hann hafi í tvígang farið í meðferð, og gert tilraunir til að bæta ráð sitt eftir að ofbeldisbrotið var framið, til refsimildunar.

Árið 2019 var greint frá því að Ívar hefði verið dæmdur fyrir líkamsárás á Laugardalsvelli og 23 önnur brot. Árásin fólst í því að hann sló einstakling í andlit, en samdægurs voru haldnir tónleikar hljómsveitarinnar Guns N'Roses á Laugardalsvelli. Þar kom fram að brotaferillinn næði aftur til ársins 2008 og að hann hefði verið meðlimur í svokölluðu Árnesgengi, sem dæmt var fyrir fjölda þjófnaða í Árnessýslu árið 2006.

Fyrir 10 árum steig Ívar fram í fjölmiðlum eftir að sérsveitin hafði brotið sér leið inn í sumarbústað í Árnessýslu, þar sem hann dvaldi í brúðkaupsferð, í leit að öðrum manni.