Umræðan um hunsaðan almannavilja gegn sameiningu MA og VMA veldur mér andagift. Aðskilnaðarsinnar og íhaldsmenn misskilja heilaga hagkvæmni og telja hana illa! Miskunnum þeim og fyrirgefum. Í staðinn fyrir að skamma þá er best að lýsa fyrir þeim hinu fallega, fullkomna og hagkvæma skeri sem upplýstir sjá fyrir sér í draumum sínum.

Við munum öll búa í Íslandsborg, fyrrum Reykjavík, en landsóbyggðirnar verða nýttar í skógrækt og einkarekna stóriðjubæi í erlendri eigu. Íslandsborg verður hönnuð eftir aðalskipulagi Reykjavíkur 1962-1983, þar sem er einungis gert ráð fyrir átta hæða glerkössum og hraðbrautum. Fólk mun klæðast lopapeysum, stígvélum og laxleðurbuxum og leigja íbúðir í göngufjarlægð frá Borgarlínustoppi. Allt skal lúta einum vilja, undir hagkvæmum markaðsstalínisma Jóakims Aðalandar og Rikka Ríka til þess að tryggja frelsi og hamingju.

Við munum öll vinna við hugbúnaðartengd störf, en yfirmenn og þingmenn skulu vera vélmenni sem spila skák um alla ákvarðanatöku, sem mun spara milljarða. Öll menning verður bönnuð vegna hljóð- og sjónmengunar, en RÚV sýnir Friends, klám og auglýsingar. Áfengi verður selt í verslunum, takmarkað við Tuborg grön (sem er nú alveg nóg!). Það verður drukkið með hagkvæmum mat, t.d. ósöltuðum hafragraut og soðnum kartöflum. 

Allir sem veikjast verða sendir til Svíþjóðar með fraktskipi, en á bakaleiðinni mun skipið sækja túrista og unglinga með vinnu- og neyslufíkn frá Bandaríkjunum og Schengen-svæðinu. Vegna kostnaðar verður framleiðslu á innlendum börnum hætt, en innfluttir unglingar munu þess í stað ganga í innlendan menntaskóla þar sem þau munu læra dönsku, sænsku og nýsköpun á tveimur árum áður en þau fara í viðskiptafræði hjá HR.

En Kjartan, hvernig getum við hagrætt svo að menntaskólanám taki ekki nema tvö ár?

Svo þetta markmið náist sting ég upp á sannarlega hógværri tillögu um sameiningu menntaskólanna. Við stofnum einn menntaskóla á miðju Íslandi, Menntaskólann á Sprengisandi, með rými fyrir 12.500 nemendur, auk 50 kennara og  þriggja námsráðgjafa. Skólabyggingarnar munu vera sjö gluggalausir hringir, með flötum þökum þar sem á vex vistvænn mosi. Í byggingunum verður mygla, en hið sífellda viðhald mun bjóða iðnnemum upp á hentugt námsumhverfi. Kindavegir til skólans munu vera opnir í tvær vikur á ári, í byrjun haustannar og síðan aftur við lok vorannar, þannig að krakkarnir hafa nægan tíma til þess að labba í skólann, enda eru hagkvæmustu innviðir Íslands ekki rándýrir malarvegir, heldur kindastígar. Stígurinn verður kannski merktur „menntavegurinn“ og yrði eini útgjaldaliður ríkisins á landsóbyggðunum.

Menntaskólinn á Sprengisandi er ekki sjálfsprottin hugmynd, en ég þakka bæjarstýru Kópavogs og Barnamálaráðherra fyrir að hafa veitt mér innblástur að þessum pistli, með sína dygga starfi í þágu hagræðingar lífs míns.