Alls sjö lang­reyðar hafa verið drepnar síðan Anahita Babaei og Elissa Bijou stigu niður úr möstrum hval­veiði­skipa við Reykja­vík­ur­höfn á þriðju­dag. Skipin fóru af stað sól­ar­hring eftir að Anahita og Elissa voru keyrðar af vett­vangi í lög­reglu­bíl. 

Þær voru við hval­stöð­ina í Hval­firði þegar þrjár lang­reyðar voru dregnar þar á land á föstu­dag. Anahita sagð­ist hafa fundið til sárs­auka þegar hún sá dýrin líf­laus. Sá sárs­auki var greini­legur í and­liti hennar þar sem hún stóð og hélt á kerti í and­dyri mat­væla­ráðu­neyt­is­ins í morgun. „Ég finn til á sama hátt og hval­irnir,“ sagði Anahita. 

Á tólfta degi hungurverkfalls

Í and­dyr­inu var einnig dýra­vel­ferð­ar­sinn­inn Samuel Rostøl. Hann fór í hung­ur­verk­fall sama dag og Svandís Svav­ars­dóttir mat­væla­ráð­herra ákvað að aflétta banni á hval­veiðar fyrir tæpum tveimur vikum síðan. Samuel leið ágæt­lega þrátt fyrir að hafa ekki smakkað mat 12 daga. Spurður um það hversu lengi hann ætl­aði sér að halda út sagð­ist hann helst vilja hætta verk­fall­inu í dag, ef Svandís myndi ákveða að banna hval­veiðar að nýju. En hann ætlar að halda eitt­hvað áfram, á meðan heilsan leyfði. 

„Ég verð að lifa þetta af vegna þess að vanda­málið með hval­veiðar mun halda áfram á Íslandi og í öðrum löndum,“ sagði Samuel sem var einnig staddur við hval­stöð­ina í Hval­firði á föstu­dag þegar lang­reyð­arnar voru dregnar þangað. 

„Þetta er hræði­legur atburður til þess að verða vitni að og vita fyrir hvaða sárs­auka þeir urðu fyrir.“

Telur lög um dýravelferð brotin

Við hlið Samuels stóð Micah Garen kvik­mynda­gerð­ar­maður sem hefur mót­mælt hval­veiðum hér á landi og sér fram á að gera það áfram. Hann telur gefið mál að stöðva eigi hval­veiðar þar sem lög um dýra­vel­ferð hafi verið brotin með drápum á tveimur lang­reyðum sem skotnar voru í tvígang. 

„Það þarf að gera hlé á veiðum strax því regl­urnar hafa verið brotnar,“ sagði Micah.

Það að dýrin hafi verið með sár eftir tvo skutla þýðir að þau hafi ekki drep­ist við fyrsta skot. 

Und­an­fari þess að Svandís ákvað að gera hlé á hval­veiðum í júní var sá að fagráð um vel­ferð dýra komst að því að ekki væri hægt að tryggja mann­úð­lega aflífun stór­hvela og að hval­veið­arnar sam­ræmd­ust ekki lögum um dýra­vel­ferð. Henry Alex­ander Henrys­son, full­trúi sið­fræði­stofn­unar HÍ í ráð­inu, sagði í sam­tali við Heim­ild­ina eftir að hval­veiðar höfðu verið heim­il­aðar að nýju að það hefði ekki breyst – enn væri ekki hægt að tryggja mann­úð­lega aflífun stór­hvela. 

Micah telur ljóst að lög um dýra­vel­ferð hafi verið brotin með aflífun lang­reyð­anna sem skotnar voru í tvígang og það í slæmu veðri.

Mót­mæl­end­urnir hafa ekk­ert heyrt frá stjórn­völdum en Anahitu og Elissu bíða kærur fyrir hús­brot frá Hvali hf. fyrir að hafa klifrað upp í möstur skip­anna í mót­mæla­skyni í byrjun síð­ustu viku og setið þar í 33 klukku­stundir. Fyr­ir­tækið hefur farið fram á að þær greiði sekt sem nemur 500.000 krónum.

Áfram verða lang­reyðar veiddar hér á landi en í fyrra stóð ver­tíðin til 28. sept­em­ber. Hvalur hf. hefur heim­ild til þess að veiða 161 dýr í ár, þó ólík­legt megi telj­ast að svo margir hvalir falli í val­inn á þessu stutta tíma­bili.