Töluverður titringur virðist orðinn innan raða sjálfstæðisfólks vegna núverandi ríkisstjórnarsamtarfs. Síðustu daga hafa tveir framámenn í flokknum, Elliði Vignisson bæjarstjóri í Ölfusi, og Brynjar Níelsson, fyrrverandi þingmaður Sjálfstæðisflokksins, birt greinar þar sem þeir hafa hellt úr skálum reiði sinnar vegna stjórnarsamstarfsins og vegna framgöngu ráðherra og þingmanna flokksins. Formaður Miðflokksins gerir fyrir vikið að þeim stólpagrín og framámaður í Vinstri grænum uppnefnir þá, og fleiri Sjálfstæðismenn, „Karlakórinn Grátbræður“.

Grein Brynjars birtist í fyrradag undir fyrirsögninni „Herkvaðning til hægri manna og borgaralegra afla“. Í henni er Brynjar ekkert að skafa utan af því. 

„Sjálfstæðisflokkurinn hefur nú verið í stjórn í sex ár með stækum vinstri flokki af gamla skólanum og venjulegum Framsóknarflokki sem veit sjaldan í hvorn fótinn hann á að stíga og forðast að taka erfiðar ákvarðanir. Nú er svo komið að sjálfstæðismenn eru víða mjög óhressir með stöðuna á stjórnarheimilinu og eru hreinlega ekki að átta sig fyrir hvað flokkurinn stendur í þessu stjórnarsamstarfi,“ skrifar Brynjar heldur óhress. Brynjar var sem kunnugt er aðstoðarmaður Jóns Gunnarssonar dómsmálaráðherra allt þar til Jóni var vikið úr ríkisstjórn í júní síðastliðnum, við litla hrifningu þeirra beggja.

Hvalveiðibannið hleypir illu blóði í Sjálfstæðismenn

Brynjar fer hörðum orðum um samflokksmenn sína á þingi, sem hafi ekki stigið niður fæti þegar Svandís Svavarsdóttir matvælaráðherra stöðvaði hvalveiðar Kristjáns Loftssonar daginn áður en þær áttu að hefjast. Þá segir hann að eintómt aðgerðarleysi hafi ríkt í orkumálum í tíð ríkisstjórnarsamstarfsins, lög um útlendinga séu ónýt en ekki þurfi „neinn speking til að átta sig á að nauðsynlegu regluverki í þessum málaflokki verður ekki komið á í stjórnarsamstarfi við Vg nema með látum.“

Brynjar ákallar því hægri menn og borgaralega sinnaða menn, en greinin öll er meira og minna í karlkyni, til að láta í sér heyra. „Ef flokkurinn ætlar að halda þessu samstarfi óbreyttu vegna þess að formönnum ríkisstjórnarflokkanna líður vel svo saman og ráðherrum annt um stólana, er viðbúið að brestir myndist í samstöðu hægri manna og borgaralega afla,“ skrifar Brynjar.

Hræðast flótta yfir í Miðflokkinn

Í Facebook-færslu sem Brynjar skrifaði í gær sést að heldur hefur sljákkað í honum. Segir hann að tilgangur greinarinnar hafi verið að þjappa flokksmönnum saman. „Það er engin lausn að stofna nýjan flokk hægri manna eða ganga í Miðflokkinn, eins konar einkafirma Sigmundar Davíðs, eins ágætur og hann er. Það er enginn annar flokkur með stefnu Sjálfstæðisflokksins. Í stórum lýðræðislegum flokki koma fram ólík sjónarmið og við eigum að berjast fyrir okkar sjónarmiðum innan flokksins og afla þeim fylgis. Ekki rjúka á dyr í fússi“

Sigmundur Davíð Gunnlaugsson formaður Miðflokksins birtir í dag grein þar sem hann gerir stólpagrín að þessum viðsnúningi Brynjars. Eftir að hafa hrósað honum fyrir kjarnyrt greinarskrif segir Sigmundur: „En svo fóru svipurnar á loft í Valhöll og Brynjar, sem hafði haft rétt fyrir sér daginn áður og vissi það vel, skrifaði nýja færslu. Að þessu sinni um að hann væri ekki í „einkafirma” og þyrfti því að láta undan fólki með allt aðrar skoðanir. 

Það hefði verið betra og skemmtilegra ef Brynjar hefði birt þennan seinni pistil á myndbandsformi. Helst haldandi á dagblaði til að sýna dagsetninguna. Þá hefði hann getað blikkað augunum til að senda okkur frekari skilaboð. Þrjú stutt, þrjú löng, þrjú stutt.“

„Ég styð ekki lengur þessa ríkisstjórn“

Í gær birtist þá grein Elliða undir fyrirsögninni „Ég styð ekki lengur þessa ríkisstjórn“. Þar byrjar Elliði á að reka þann varnagla, sem hann beinir til andstæðinga Sjálfstæðisflokksins, að þeir geti gleymt því að flokkurinn sé að klofna. „Gleymið hugmyndinni um að við sem erum ósátt teljum kröftum okkar og hugsjónum betur borgið innan Miðflokksins. Gleymið hugmyndinni um að við kennum formanni okkar um stöðuna. Verið samt alveg viss um að við erum mörg ósátt og viljum breytingar, og það strax.“

Elliði segir að hann hafi stutt ríkisstjórnarsamstarfið þegar til þess var stofnað, til að ná ró og stöðugleika. Hins vegar styðji hann ekki lengur ríkisstjórnina. „Ástæðan er sú að þessi ríkisstjórn, vinnulag hennar og áherslur, eru fjarri þeim gildum sem við mörg innan Sjálfstæðisflokksins viljum vinna að.“ Síðan vísar Elliði í sömu mál og Brynjar, hvalveiðibann, orkumál og útlendingamál.

„Krafan er skýr. Annaðhvort verður að verða breyting á áherslum þessarar ríkisstjórnar eða að Sjálfstæðisflokkurinn stendur frammi fyrir því að lífdagar hennar eru taldir.“

Segir sjálfstæðismönnunum að hafa áhyggjur af sínum eigin flokki

Í sinni grein gerir Sigmundur Davíð líka grín að skrifum Elliða, og einkum virðist honum skemmt yfir hræðslu hans, og raunar Brynjars, yfir því að einhverjir óánægðir Sjálfstæðismenn gætu gerst liðhlaupar og hörfað yfir í Miðflokkinn. „Ekki hafa áhyggjur af Miðflokknum. Verið þið sjálfir. Hafið frekar áhyggjur af því að samkvæmt nýjustu könnun séuð þið fyrst og fremst að missa fylgi til Pírata! og Samfylkingarinnar,“ skrifar Sigmundur Davíð í kersknislegum tón.

Bjarni Benediktsson sagði í viðtalið í Þjóðmálum, vefsjónvarpi Morgunblaðsins, í síðustu viku að hvalveiðibann Svandísar hefði sett stjórnarsamstarfið allt upp í loft. Flokkurinn hafi ekki ætlað sér að fara í stjórnarsamstarf um bann við hvalveiðum. Á sama vettvangi 20. júní síðastliðinn, nema í það skiptið hét þátturinn Dagmál, lýsti Jón Gunnarsson því, degi eftir að hann var settur af sem ráðherra, að núverandi stjórnarsamstarf gengi ekki áfram. „Mitt mat er það að í dag sé þetta farið að verða þjóðinni dýrkeypt,“ sagði Jón meðal annars í það skiptið.

Óli Björn Kárason, þingflokksformaður Sjálfstæðisflokksins, birti 5. júlí grein í Morgunblaðinu þar sem hann skrifaði: „Matvælaráðherra hefur gert atlögu að samstarfi ríkisstjórnarflokkanna. Og þar með veikt ríkisstjórnina og grafið undan möguleikum hennar til að leysa erfið verkefni á komandi mánuðum.“ Það eru ekki einu greinarskrif Óla Bjarnar þar sem hann hefur haft ýmislegt á hornum sér varðandi stjórnarsamstarfið.

 Miðaldra sjálfstæðismenn sem gráta fallega

Stefán Pálsson, varaborgarfulltrúi Vinstri grænna, eiginmaður Steinunnar Þóru Árnadóttur þingmanns, og áhrifamaður innan flokksins til margra ára brást í morgun við skrifum þeirra Elliða og Brynjars, og vísaði raunar einnig í viðtölin við Jón, Bjarna og skrif Óla Bjarnar. Á Facebook-síðu sinni birti hann færslu sem hefst á orðunum „Karlakórinn Grátbræður“.

„Mikið er nú aumt að fylgjast með viðkvæmu blómunum, riddaraliðssveit miðaldra Sjálfstæðismanna, sem grætur svo fallega á síðum helstu málgagna flokksins. Margt bendir til að stórir hlutar Sjálfstæðisflokksins séu að verða óstjórntækir með öllu, enda sturlaðir af frekju og hlaupa upp með stjórnarslitahótunum þegar þeir fá ekki allt sem þeir vilja. Sú spurning vaknar hvort þessi armur flokksins sé algjörlega ófær um að vera í stjórnarsamstarfi með flokki sem hann getur ekki vaðið yfir?“ skrifar Stefán.

Athygli vekur orðalag Stefáns þegar hann talar um að Sjálfstæðismenn gráti fallega á „síðum helstu málgagna flokksins“. Greinar þeirra Elliða og Brynjars birtust báðar á vefsíðunni Viljanum, undir stjórn Björns Inga Hrafnssonar, en sá miðill hefur hægt og rólega verið að vakna úr dái síðustu vikur.

Ekki hefur orðið vart við viðbrögð annars flokksfólks Vinstri grænna við greinaskrifunum, svo séð verði. Þá er ekki að sjá að Framsóknarmenn kippi sér neitt sérstaklega upp við málið. Því má segja að ýfingarnar séu, í það minnsta enn sem komið er, því sem næst eingöngu innan Sjálfstæðisflokksins. Í bróðerni þeir vega þar hvern annan.