Matvælastofnun hefur kært tvo bændur í Vestur-Húnavatnssýslu til lögreglu, fyrir að hafa neitað að afhenda fé sem þeim hafði verið gert að afhenda til niðurskurðar. Féð fengu bændurnir frá bænum Syðri-Urriðaá en þar greindist í vor ein aðkeypt kind með riðu. Fjárstofninn á Syðri-Urriðaá var skorinn niður en engin riða greindist í öðrum gripum en þeim eina sem um ræddi.

Í apríl á þessu ári var staðfest riða á bænum Bergsstöðum í Vestur-Húnavatnssýslu. Bærinn er í Miðfjarðarhólfi og var það í fyrsta skipti sem riða greindist í hólfinu. Allur stofninn var skorinn niður, 690 kindur. Í framhaldinu voru kindur sem keyptar höfðu verið frá Bergstöðum skornar og rannsakaðar. Kom þá í ljós að ein kind á Syðri-Urriðaá, sem kom frá Bergsstöðum, var riðuveik. Í framhaldinu var allt fé á bænum skorði, alls um 720 kindur. Sem fyrr segir greindist ekki frekari riða á bænum.

Bændum sem fengið höfðu fé frá Syðri-Urriðaá var í framhaldinu gert að afhenda umrætt fé til slátrunar svo unnt yrði að taka úr því sýni, en riðusmit verður ekki staðfest nema með því að aflífa féð og rannsaka það að því loknu. Fyrirskipanir um þetta bárust bændum 9. maí og var þeim skipað að afhenda fé sitt vikuna á eftir.

Vakti krafa Matvælastofnunar verulega úlfúð meðal bænda þar eð sauðburður var þá hafinn og flestir bændur bæði mjög uppteknir við þau störf og jafnvel búnir að setja fé út. Þá hafði Sigurborg Daðadóttir yfirdýralæknir áður gefið það út að ekki yrði fleira fé skorið á meðan á sauðburði stæði. Í ofanálag var bændum gert að svara kröfu Matvælastofnunar innan tveggja daga og þótti það ekki góð stjórnsýsla.

Um var að ræða níu bæi og alls voru gripirnir 35 sem átti að afhenda. Því virðist vera að bændur á tveimur af þessum bæjum hafi ekki orðið við kröfu Matvælastofnunar um að afhenda féð. Í tilkynningu á síðu Matvælastofnunarinnar segir að samkvæmt dýrasjúkdómalögum sé refsivert að brjóta gegn fyrirmælum sem þessum.

„Það er álit stofnunarinnar að með synjun sinni stofni bændurnir ekki aðeins heilsu dýra sinna í hættu heldur einnig heilsu sauðfjár í eigu annarra, þ.e. fjár sem hefur samgang við þeirra fé,“ segir á vef stofnunarinnar.