Búið er að opna gönguleið um Meradali upp að gosstöðvunum við Litla Hrút. Sú ákvörðun var tekin nú um eitt leytið en í morgun var ákveðið að halda leiðinni lokaðri fram yfir hádegi. 

Fréttin hefur verið uppfærð. Sjá má upphaflega frétt hér að neðan.

Áfram verður lokað fyrir ferðir að gosstöðvunum við Litla Hrút, í það minnsta fram yfir hádegi í dag. Tekin var ákvörðun um þetta á fundi viðbragðsaðila nú í morgun. Staðan verður endurmetin klukkan eitt í dag.

Í tilkynningu frá lögreglustjóranum á Suðurnesjum kemur fram að reykur frá gróðureldum berist nú yfir gönguleiðina að gosstöðvunum og af þeim sökum sé ekki hægt að tryggja öryggi þeirra sem fari inn á svæðið. Unnið er að því að slökkva gróðureldana norðaustan við Keili í átt að útsýnisstað að gosinu. Þyrla landhelgisgæslunnar aðstoðaði við slökkvistörf um helgina og notaðist við slökkviskjólu, svokallaðan bamba, við þau störf. Þyrlan mun áfram taka þátt í slökkvistarfinu í dag.

Lokað var fyrir ferðir að gosstöðvunum síðastliðinnn fimmtudag og hefur verið lokað þangað síðan. Það hefur þó ekki komið í veg fyrir að fólk hafi lagt af stað að gosinu og í nótt sem leið þurftu björgunarsveitir að aðstoða og leita að göngumönnum. Kona sem leitað var að í nótt fannst á þriðja tímanum og karlmaður sem einnig var leitað að fannst á sjötta tímanum á sævðinu.

Búast má við að gasmengunar verði vart á Suðurstrandarvegi í dag, sem og á gönguleiðum að gosstöðvunum en norðan og norðvestan átt er á svæðinu og berst mengunin því til suðurs. Vindaspá fyrir daginn gerir ráð fyrir 5 til 8 metrum á sekúndu og bætir heldur í vind á síðdegis á morgun en lægir svo seint annað kvöld.