Þó hægt sé að ganga að eldgosinu við Litla-Hrút á Reykjanesi úr mörgum áttum mælast almannavarnir til þess að fólk gangi einungis Meradalaleið sem hefst við bílastæðið við Suðurstrandarveg. 

Umferð almennings um svæðið er óheimil sem stendur vegna mengunar frá gróðureldum á svæðinu sem getur verið fólki hættuleg, hættulegri en gosmengunin sjálf, að sögn Hjördísar Guðmundsdóttur, samskiptastjóra almannavarna. Ákvörðun um það hvort gönguleiðin verði opnuð að nýju verður tekin í fyrramálið.

Hjördís segir að gönguleiðin geti verið erfið. Hún er um níu kílómetra löng aðra leið og tekur fimm til sjö klukkustundir. Fólk hefur komið til baka örþreytt og jafnvel lent í óhöppum á leiðinni. Hjördís segir því mikilvægt að fólk velji Meradalaleið svo viðbragðsaðilar viti alltaf hvar fólk er. 

ÚtsjónarsemiFólk gengur ekki einungis að gosstöðvunum. Sumir hjóla.

Mynd: AFP

„Maður heyrir af því að fólk sé að mæla með öðrum gönguleiðum, en það er ekki gott því þá hafa viðbragðsaðilar ekki sömu yfirsýn,“ segir Hjördís. „Það þarf að hugsa þetta til enda. Það er eitt að komast upp að eldgosinu en svo er annað að komast líka til baka.“

Hvernig á fólk að vera búið?

„Eins og það sé að fara í alvöru göngu. Þó það sé gott veður þegar þú byrjar þá þýðir það ekki að það verði gott veður þegar þú labbar til baka,“ segir Hjördís og biðlar til fólks að taka með sér vatn, enda er ekkert slíkt á leiðinni. 

Ekki staður fyrir lítil börn

Nokkuð hefur verið um að fólk hafi ætlað að taka með sér ung og jafnvel ómálga börn að gosstöðvunum. Hjördís segir það ekki skynsamlegt. „Þetta er ekki staður fyrir lítil börn til að vera á.“

Ástæðan er fyrst og fremst gasmengunin sem getur farið illa í viðkvæm ung lungu. 

En í bili er mengunin á svæðinu hættuleg öllum og því óheimilt að ganga upp að gosinu. Hvort helgarferðir að gosinu verði mögulegar er enn ómögulegt að segja til um.

Mynd: Stefán Ari