Markús Ingólfur Eiríksson, forstjóri Heilbrigðisstofnunar Suðurnesja (HSS), segist hafa verið „beittur óeðlilegum þrýstingi og orðið fyrir óviðunandi framkomu“ af hálfu Willums Þór Þórssonar heilbrigðisráðherra, með þátttöku ráðuneytisstjóra heilbrigðisráðuneytisins, er hann hafi reynt að fá aukin fjárframlög til stofnunarinnar.
Frá þessu segir forstjórinn í yfirlýsingu á vef HSS og dregur fram að hann telji framgönguna ekki í samræmi við góða stjórnsýslu né siðareglur ráðherra.
Markús segist hafa óskað eftir því að umboðsmaður Alþingis taki samskiptin við ráðherra og ráðuneytisstjóra til skoðunar, auk þess sem hann hefur óskað eftir áliti umboðsmanns á þeim ágreiningsmálum sem eru uppi varðandi fjármögnun heilbrigðisþjónustu á Suðurnesjum. Hann segir verulega hafa skort á efnisleg svör frá ráðuneytinu við erindum HSS um stöðu mála.
Fjárveitingar langt frá því að halda í við fjölgun íbúa
Í yfirlýsingu Markúsar segir að allt frá árinu 2019, er hann tók við sem heilbrigðisráðherra, hafi hann beitt sér fyrir því að bæta þjónustu við íbúa Suðurnesja og í því hafi m.a. falist að „berjast gegn því ranglæti sem íbúarnir hafa þurft að þola af hálfu stjórnvalda, sérstaklega hvað varðar það að fjárveitingar til heilbrigðisþjónustu á svæðinu hafa ekki tekið mið af fjölgun íbúa og þróunar rekstrarkostnaðar.“
Hann bendir á að skýrsla sem Deloitte vann fyrir HSS, og uppfærð var í síðasta mánuði með nýjustu upplýsingum, sýni fram á að fjárframlög til heilbrigðisþjónustu á hvern íbúa á Suðurnesjum hafi dregist saman um 27 prósent fyrir stofnunina í heild og þar af um 50 prósent á sjúkrasviði, frá árinu 2008.
„Staðan hefur því hríðversnað milli ára, þrátt fyrir ítrekaðar tilraunir af minni hálfu til að fá heilbrigðisráðuneytið og ráðherra til að leiðrétta það stóra gat sem aðgerðarleysi stjórnvalda um árabil hefur leitt af sér, gat sem núverandi ráðherra ber ekki einn ábyrgð á að myndaðist,“ segir forstjórinn í yfirlýsingunni.
Verulegur ágreiningur
Hann segir að í fyrra hafi verið ljóst að það stefndi í óefni, en heilbrigðisráðuneytið hefði ekki brugðist við með fullnægjandi hætti. Aukafjárveitingar hefðu fengist, sem ekki hefðu dugað til enda væri grunnvandi stofnunarinnar enn óleystur.
„Eftir birtingu uppfærðu skýrslu Deloitte í síðustu viku, fékk ég formlegt bréf frá ráðuneytinu um að miðað við umfang starfsemi slysa- og bráðamóttöku HSS væri sú deild vanfjármögnuð og ráðuneytið hygðist beita sér fyrir að fjárveitingar til hennar yrðu hækkaðar um 300 m.kr. í fjárlögum næsta árs. Með þeirri ákvörðun ráðuneytisins felst ákveðin viðurkenning á að minn málflutningur sé samkvæmur sannleikanum. Hún dugar þó ekki til að leysa vandann nema að hluta,“ skrifar Markús í yfirlýsingu sinni.
Forstjórinn segir segir þar jafnframt að ágreiningurinn á milli hans og heilbrigðisráðherra um skyldur stjórnvalda um fjármögnun þjónustu við íbúa Suðurnesja sé verulegur.
„Ég hef því tekið ákvörðun um að óska eftir áliti Umboðsmanns Alþingis á þeim ágreiningsmálum enda hefur verulega skort á efnislegum svörum af hálfu ráðuneytisins við erindum mínum og niðurstöðum skýrslna Deloitte. Þá hef ég einnig ákveðið að óska eftir að Umboðsmaður Alþingis taki afstöðu til framgöngu ráðherra, með þátttöku ráðuneytisstjóra heilbrigðisráðuneytisins, gagnvart mér þegar ég sinnti starfsskyldum mínum sem felast í að upplýsa um óþægilegar staðreyndir eða gagnrýna stjórnvöld. Sú framganga er að mínu mati hvorki í samræmi við góða stjórnsýslu né siðareglur ráðherra þar sem ég hef verið beittur óeðlilegum þrýstingi og orðið fyrir óviðunandi framkomu,“ segir í yfirlýsingu Markúsar.
Markús hefur verið forstjóri HSS frá árinu 2019, en starfaði þar áður hjá Ríkisendurskoðun, sem sérfræðingur á stjórnsýslusviði.
Athugasemdir