„Til hvers er ríkið ef það er ekki til að bregðast við ástandi sem þessu, til að dreifa högginu af því áfalli sem nú stendur yfir?“ spurði formaður Samfylkingarinnar, Kristrún Frostadóttir, á þingi í dag.
Forseti Alþingis samþykkti beiðni Samfylkingarinnar um að efna til þingfundar um efnahagsmál í kjölfar 1,25 prósentustiga hækkunar Seðlabanka Íslands á stýrivöxtum nú í morgun. Von er á að fundur verði næstkomandi þriðjudag.
Þingmenn fögnuðu samþykki Birgi Ármannssonar forseta Alþingis og kölluðu eftir svörum frá ríkisstjórn. Þar á meðal var þingmaður Pírata, Björn Leví Gunnarsson. „Ég tek undir þá beiðni sem hefur komið fram um að hafa þingfund til að ræða stöðu efnahagsmála af því að það er alveg augljóst að efnahagsstjórnin er að mistakast.“
Þá hvatti Guðmundur Ingi Kristinsson þingmaður Flokk fólksins einnig til þess að haldinn yrði fundur og sagði ríkisstjórnina vera steinsofandi. „Hún sér ekkert, talar ekkert, heyrir ekkert og gerir ekkert. Það er kominn tími til að við höldum hérna almennan fund og vekjum hana þannig að hún fari nú að hjálpa þeim sem þurfa virkilega á hjálp að halda.“
Jóhann Páll Jóhannsson þingmaður Samfylkingarinnar tók undir með formanni sínum í pontu. „Við þurfum að verja leigjendur fyrir snjóhengju á leigumarkaði með breytingum á húsaleigulögum. Við þurfum að hækka vaxtabætur, sérstaklega til þeirra heimila sem eru í senn, tekjulág og finna fyrir æ meiri greiðslubyrði [...].“
Þingmaður Viðreisnar, Sigmar Guðmundsson, telur neyðarástand ríkja í efnahagsmálum þjóðarinnar. „Hagstjórnin hér á landi er í molum. Það er fullt af fólki sem er að taka á sig alveg svakalegt högg, fyrirtæki líka. Þetta er að hafa gríðarleg áhrif inn í framtíðina. Við erum að búa til nýja húsnæðisbólu og lítið er verið að gera í ríkisstjórninni.“
Jakob Frímann Magnússon, þingmaður Flokk fólksins, hvatti þingmenn þá til þess að leita sér þekkingar og ráðgjafar svo að hægt yrði að takast á við efnahagsmálin í næstu viku.
Athugasemdir (1)