Samherji hefur sent frá sér til­kynn­ingu þar sem full­yrt er að fyr­ir­tækið sæti skipu­lagðri árás. Ástæðan er sú að aðilar, ótengdir sjáv­ar­út­vegs­fyr­ir­tæk­inu, hafa sent fals­aða frétta­til­kynn­ingu á erlenda fjöl­miðla, í nafni Samherja. Sömu­leiðis hefur verið sett upp heima­síða í nafni fyr­ir­tæk­is­ins, hýst í Bret­landi þar sem stendur stórum stöfum á for­síðu „Við biðj­umst afsök­unar“ (e. We‘re Sorry).

Í umræddri frétta­til­kynn­ingu segir að Samherji vilji með henni gefa út form­lega afsök­un­ar­beiðni vegna Namib­íu­máls­ins. „Við við­ur­kennum alvar­leika ásak­ana á hendur okkur, meðal ann­ars um spill­ingu, mútu­greiðslur og nútíma nýlendu­stefnu. Með gjörðum okkar höfum við grafið undan stjórn­kerfi Namibíu og svipt landið mik­il­vægum tekjum til heil­brigðis- og mennta­mála.“

Í hinni upp­dikt­uðu til­kynn­ingu er jafn­framt sagt að Samherji sé fyr­ir­tæki sem sé annt um mann­rétt­indi og félags­leg rétt­indi og því taki það fulla ábyrgð á gjörðum sínum. Samherji heiti fullu sam­starfi við yfir­völd, íslensk jafnt sem namibísk, auk ann­arra. Þá sé fyr­ir­tækið reiðu­búið til að bæta fyrir gjörðir sínar, með því að koma „stolnum eignum“ namibísku þjóð­ar­innar aftur til sinnna rétt­mætu eig­enda.

Í lok frétta­til­kynn­ing­ar­innar er bent á að hægt sé að fá frek­ari upp­lýs­ingar með því að hafa sam­band við Friðriku Eysteins­dóttur, upp­lýs­inga­full­trúa. Engin kona með því nafni er hins vegar til.

Á raun­veru­legri vef­síðu Samherja segir að hvorki umrædd heima­síða né umrædd frétta­til­kynn­ing  hafi nein tengsl við Samherja eða starfs­menn fyr­ir­tæk­is­ins. „Svo virð­ist sem um sé að ræða skipu­lagða árás sem fyr­ir­tækið tekur mjög alvar­lega. Samherji mun óska eftir því að hin falska vef­síða verði tekin niður.“