Stóru viðskiptabankarnir þrír: Íslandsbanki, Landsbankinn og Arion banki, högnuðust samtals um 20,3 milljarða króna á fyrstu þremur mánuðum ársins, en þeir birtu allir uppgjör vegna fyrsta ársfjórðungs í gær.
Allir bankanir juku hagnað sinn frá sama tímabili 2022.
Hagnaður Landsbankans, sem er að mestu í eigu íslenska ríkisins, á fyrsta ársfjórðungi var 7,8 milljarðar króna. Til samanburðar hagnaðist bankinn um 3,2 milljarða króna á sama tímabili 2022. Því jókst hagnaður Landsbankans á fyrsta ársfjórðungi um 144 prósent milli ára.
Stóra breytan þar er áfram sem áður gagnvirði óskráðra eignarhluta bankans, aðallega í Eyri Invest hf., en hagnaður af því gangvirði var tæplega 3,3 milljarðar króna á fyrstu þremur mánuðum ársins. Landsbankinn á 14,1 prósent í Eyri Invest, sem er langstærsti eigandi Marel. Markaðsvirði Marel jókst um 16 prósent frá áramótum og út marsmánuð.
Sú hækkun þurrkaðist hins vegar út í gær þegar bréf í félaginu féllu um tæplega 18 prósent eftir að Marel birti uppgjör sem olli vonbrigðum, aðallega vegna þess að pantanir hjá félaginu höfðu dregist umtalsvert saman milli ára.
Hreinar vaxtatekjur Landsbankans á fyrstu þremur mánuðum ársins 2023 voru 13,1 milljarður króna og var langstærsti hluti veltu bankans, sem alls nam 17,3 milljörðum króna. Vaxtatekjurnar voru 27,3 prósent hærri en á sama tímabili í fyrra. Í uppgjörskynningu segir að þetta sé vegna hækkandi vaxtaumhverfis og stækkun á efnahagsreikningi Landsbankans, en útlán bankans hafa aukist um 160 milljarða króna á síðustu 12 mánuðum. Vaxtamunur var 2,8 prósent hjá Landsbankanum á fyrsta ársfjórðungi.
Vill ljúka „bestun efnahagsreiknings“
Íslandsbanki, þar sem íslenska ríkið er enn stærsti eigandinn, hagnaðist um 6,2 milljarða króna á fyrstu þremur mánuðum ársins. Það er einum milljarði króna meira en bankinn hagnaðist um á sama tíma í fyrra. Arðsemi eigin fjár hans jókst milli ára og var 11,4 prósent sem er yfir markmiði Íslandsbanka.
Mestu munaði um mikinn vöxt í vaxtatekjum sem jukust um 34,9 prósent milli ára og voru 12,4 milljarðar króna á fyrsta ársfjórðungi. Vaxtatekjurnar byggja á muninum á þeim vöxtum sem bankarnir borga fyrir að fá peninga að láni og þeim vöxtum sem þeir rukka fyrir að lána einstaklingum og fyrirtækjum fjármuni. Sá munur kallast vaxtamunur. Vaxtamunur Íslandsbanka hefur hækkað umtalsvert frá því í byrjun árs í fyrra og er nú 3,2 prósent.
Þóknanatekjur jukust einnig frá sama tímabili 2022 og voru tæplega 3,5 milljarðar króna.
Kostnaðarhlutfall bankans var 42,1 prósent sem er í samræmi við markmið hans. Það var 47,6 prósent á fyrsta ársfjórðungi í fyrra.
Íslandsbanki greiddi 12,3 milljarða króna í arð til hluthafa sinna vegna árangurs hans á síðasta ári. Á aðalfundi bankans í mars var heimild hans til að kaupa eigin hluti af hluthöfum endurnýjuð. Í tilkynningu til Kauphallar Íslands segir að Íslandsbanki fyrirhugi að „halda áfram með fimm milljarða endurkaup á eigin bréfum á komandi mánuðum, og ljúka bestun efnahagsreiknings fyrir lok árs 2024, með fyrirvara um aðstæður á mörkuðum“.
Íslandsbanki er sem stendur í sameiningarviðræðum við Kviku banka. Í sameiginlegri yfirlýsingu sem þeir sendu frá sér á miðvikudag sagði að stjórnir bankanna tveggja telji að „verulegur ávinningur geti falist í samrunanum fyrir bæði hluthafa og viðskiptavini beggja félaga“.
Arion banki með mestu arðsemina
Arion banki hagnaðist um 6,3 milljarða króna á fyrstu þremur mánuðum ársins, sem er átta prósent meira en bankinn hagnaðist um á sama tíma í fyrra. Arðsemi eigin fjár var 13,8 prósent, og þar með hærri en hjá báðum helstu samkeppnisaðilunum.
Líkt og hjá hinum bönkunum tveimur var það fyrst og síðast vegna mikillar aukningar í vaxtatekjum sem jukust um einn og hálfan milljarð króna og voru rúmlega ellefu milljarðar króna. Þóknanatekjur jukust einnig umtalsvert og voru 4,4 milljarðar króna.
Vaxtamunur Arion banka var 3,1 prósent sem er sá sami og hann var á fyrsta ársfjórðungi í fyrra. Arðgreiðslur vegna frammistöðu síðasta árs og endurkaup á bréfum hluthafa námu alls 14,8 milljörðum króna á fyrstu þremur mánuðum ársins.
Athugasemdir