Torg efh, útgáfufélag Fréttablaðsins, Markaðarins, Hringbrautar og DV, var tekið til gjaldþrotaskipta í gær. Óskar Sigurðsson lögmaður á lögmannsskrifstofunni Lex hefur verið skipaður skiptastjóri í búinu.

Öllum starfsmönnum Torgs, um 100 manns, mun hafa verið sagt upp 31. mars, samkvæmt upplýsingum sem skiptastjóri aflaði frá forsvarsmönnum Torgs. Í bréfi sem starfsmenn fengu frá Óskari skiptastjóra telur hann af þeim sökum að ráðningarsambandi þeirra við Torg hafi verið slitið áður en bú félagsins var tekið til gjaldþrotaskipta. Í sama bréfi tilgreinir skiptastjóri að hafi uppsögn ekki átt sér stað muni þrotabúið ekki taka við réttindum og skyldum samkvæmt ráðningarsamningi Torgs við þeirra starfsmanna sem um ræðir. Jafnframt eru starfsmenn hvattir til hafa samband við stéttarfélög sín og leita þar aðstoðar, meðal annars við kröfulýsingar í þrotabú Torgs.

Greint hefur verið frá því að félag að fullu í eigu Helga Magnússonar, Fjölmiðlatorg ehf., hafi keypt DV.is af Torgi á 420 milljónir króna, og gerðist það áður en síðarnefnda félagið var tekið til gjaldþrotaskipta. Helgi var áður aðaleigandi Torgs. Starfsfólki DV var sagt upp störfum hjá Torgi og þeim síðan boðið að skrifa undir ráðningarsamning við hið nýja fyrirtæki.

Helgi Magnússon vildi ekkert um málið segja þegar Heimildin leitaði eftir því. „Við sendum frá okkur yfirlýsingu á föstudaginn var og ég vil engu við hana bæta, alla vega ekki að svo stöddu.“ Ekki náðist í skiptastjóra.