Sjö umsóknir bárust um embætti ráðuneytisstjóra menningar- og viðskiptaráðuneytisins. Staðan var auglýst 27. desember 2022 og umsóknarfrestur rann út þann 23. janúar 2023.

Umsækjendurnir eru: 

• Ásgeir Brynjar Torfason, doktor í fjármálum
• Daníel Svavarsson, skrifstofustjóri
• Eyjólfur Vilberg Gunnarsson, fv. sparisjóðsstjóri
• Gísli Halldór Halldórsson, fv. bæjarstjóri
• Sigrún Brynja Einarsdóttir, skrifstofustjóri
• Sigurður Erlingsson, fv. forstjóri
• Þröstur Óskarsson, sérfræðingur

Skúli Eggert Þórðarson var skipaður ráðuneytisstjóri nýs menningar- og viðskiptaráðuneytis í janúar í fyrra. Skúli var fluttur úr embætti ríkisendurskoðanda í starf ráðuneytisstjóra  á grund­velli laga um rétt­indi og skyldur starfs­manna rík­is­ins þar sem kveðið er á um heim­ild til flutn­ings emb­ætt­is­manna rík­is­ins milli starfa. Lagagreinin hefur verið mikið í umræðunni síðustu misseri í kjölfar ráðninga í störf embættismanna án auglýsingar. 

Þriggja manna hæfnisnefnd hefur verið skipuð af menningar- og viðskiptaráðherra til að meta hæfni umsækjenda og skila greinargerð til ráðherra.

Formaður hæfnisnefndarinnar er Þorgeir Örlygsson, fyrrverandi forseti Hæstaréttar og ráðuneytisstjóri í viðskiptaráðuneytinu, og aðrir nefndarmenn eru Magnús Pétursson, fyrrverandi ríkissáttasemjari og ráðuneytisstjóri í fjármálaráðuneytinu, og Valgerður Rún Benediktsdóttir, lögfræðingur hjá Sambandi íslenskra sveitarfélaga og fyrrverandi skrifstofustjóri í atvinnuvegaráðuneytinu.

Lilja Dögg Alfreðsdóttir, menningar- og viðskiptaráðherra, skipar í embættið til fimm ára frá og með 1. mars 2023.