1 11.800 fleiri íbúar

Alls bjuggu 387.800 manns á Íslandi í lok síð­asta árs. Íbúum lands­ins hafði þá fjölgað um 11.800 á einu ári. Þar af fjölg­aði Reyk­vík­ingum um 4.350, og mest allra. Það er ekki óvenju­legt, enda Reykja­vík­ur­borg langstærsta sveit­ar­fé­lag lands­ins þar sem 36 pró­sent lands­manna búa. Alls fædd­ust 4.420 manns á Íslandi á árinu 2022 og 2.700 dóu. Næstum tveir af hverjum þremur íbúum lands­ins búa nú á höf­uð­borg­ar­svæð­inu, eða 64 pró­sent. Það er nán­ast sama hlut­fall og ári áður.

2 Kynsegin fjölgaði um 86 prósent

Karl­arnir á Íslandi eru fleiri en kon­urnar og mun­ur­inn eykst milli ára. Alls voru karl­arnir 199.840 í lok des­em­ber síð­ast­lið­inn en kon­urnar 187.840. Þessa miklu aukn­ingu karla má rekja til þess að fleiri slíkir flytja til lands­ins til að starfa en konur. Fólki sem er skráð kynsegin fjölg­aði á síð­asta ári þegar fjöldi þess fór úr 70 í 130. Það er aukn­ing upp á 86 pró­sent á einu ári.

3 Erlendir ríkisborgarar 65.090

Meg­in­þorri fjölg­un­ar­innar á síð­asta ári var til kom­inn vegna þess að erlendir rík­is­borg­arar fluttu til lands­ins. Alls fjölg­aði þeim um 10.320. Þeir voru því 87 pró­sent aukn­ing­ar­innar á árinu 2022. Erlendir rík­is­borg­arar með heim­il­is­festi á Íslandi voru 65.090 um síð­ustu ára­mót, eða 16,7 pró­sent þeirra 387.800 sem þá bjuggu á land­inu. Um er að ræða mikla breyt­ingu á skömmum tíma. Hlutfall erlendra rík­is­borg­ara af heild­ar­mann­fjölda fór fyrst yfir fimm pró­sent hér­lendis árið 2006 og yfir tíu pró­sent árið 2017. Erlendum rík­is­borg­urum sem hér búa hefur aldrei fjölgað jafn mikið á einu ári áður.

4 70 prósent settust að í Reykjavík

Erlendum rík­is­borg­urum sem bjuggu á höf­uð­borg­ar­svæð­inu fjölg­aði um 6.330 í fyrra og voru 40.910 um nýliðin ára­mót. Þar af bjuggu 70 pró­sent í Reykja­vík, eða alls 28.620 manns. Það er vel umfram hlut­fall Reyk­vík­inga af öllum íbúum höf­uð­borg­ar­svæð­is­ins, en þeir voru tæp­lega 57 pró­sent þeirra í lok síð­asta árs. 

5 20 prósent íbúa höfuðborgarinnar erlend

Alls fjölg­aði erlendum rík­is­borg­urum í Reykja­vík um 4.460 á árinu 2022, sem þýðir að sjö af hverjum tíu slíkra sem sett­ust að á höf­uð­borg­ar­svæð­inu á síð­asta ári búa í Reykja­vík og fimmti hver íbúi höf­uð­borg­ar­innar er nú erlendur rík­is­borg­ari.

6 Fækkaði um 10 á Seltjarnarnesi

Fæstir erlendir rík­is­borg­arar á höf­uð­borg­ar­svæð­inu búa á Sel­tjarnesi, eða 440 alls. Þeim fækk­aði um tíu á árinu 2022. Alls eru þeir 9,4 pró­sent íbúa Sel­tjarn­ar­ness. Garðabær kemur þar á eftir með 1.150 erlenda rík­is­borg­ara, sem eru ein­ungis sex pró­sent íbúa bæj­ar­ins. Erlendum rík­is­borg­urum í Garðabæ fjölg­aði um 200 á síð­asta ári.

7 Næstum 30 prósent íbúa í Reykjanesbæ

Af stærri sveit­ar­fé­lögum lands­ins eru hlut­falls­lega flestir erlendir rík­is­borg­arar með búsetu í Reykja­nesbæ. Þar eru þeir 6.470, eða rúm­lega 29 pró­sent þeirra 22.060 íbúa sem bjuggu í sveit­ar­fé­lag­inu í lok árs 2022.

8 23.354 Pólverjar en 19.980 Akureyringar

Flestir þeirra sem eru af erlendu bergi brotnir sem hafa búsetu á Íslandi koma frá Póllandi. Þeir voru 23.345 í byrjun árs 2023 sam­kvæmt tölum frá Þjóðskrá. Því búa fleiri Pól­verjar á Íslandi en búa í heild í Reykja­nesbæ (22.060), Akur­eyr­arbæ (19.980) og Garðabæ (18.890). Ef allir íbúar lands­ins sem eru með pólskt rík­is­fang byggju í sama sveit­ar­fé­lagi væri það fjórða stærsta sveit­ar­fé­lag lands­ins á eftir höf­uð­borg­inni Reykja­vík, Kópavogi og Hafn­ar­firði.

9 640 fleiri fóru en komu

Alls voru aðfluttir umfram brott­flutta á síð­asta ári 9.910 tals­ins, en 640 fleiri íslenskir rík­is­borg­arar fluttu af landi brott en til Íslands á árinu 2022. Það er umtals­verð breyt­ing frá árunum 2020 og 2021, þegar 1.330 íslenskir rík­is­borg­arar fluttu til lands­ins umfram þá sem fluttu frá því. Á þeim árum geis­aði kór­ónu­veiru­far­aldur sem olli því að mun færri Íslend­ingar fluttu af landi brott en áður. Árið 2020 fluttu ein­ungis 2.190 íslenskir rík­is­borg­arar af landi brott, og höfðu þá ekki verið færri á einu ári síðan 1993. Ári síðar voru þeir enn færri, eða 1.590 tals­ins.

10 2.521 frá Úkraínu

Hlut­falls­lega hefur fólki frá Úkraínu fjölgað lang­mest hér­lendis síð­ast­liðið rúmt ár. Alls bjuggu 239 manns þaðan hér á landi í byrjun des­em­ber 2021 en 2.521 í byrjun þessa árs. Um er að ræða fólk sem er að flýja stríðs­á­stand í Úkra­ínu, en um 60 pró­sent allra sem sóttu um vernd á Íslandi á síð­asta ári komu það­an.