Fyrri aukaspurning:

Úr hvaða kvikmynd frá 1927 er skjáskotið hér að ofan?

***

Aðalspurningar:

1.  Espoo er 280.000 manna evrópsk borg sem núorðið er reyndar vaxin nær alveg saman við aðra borg, stærri. En í hvaða landi er Espoo?

2.  Ingibjörg Sólrún Gísladóttir varð borgarstjóri Reykjavíkur 1994. Hvað nefndust samtökin sem hún var í framboði fyrir?

3.  Doddi: Bók sannleikans og Doddi: Ekkert rugl! nefndust tvær barnabækur sem út komu 2016 og 2017. Höfundarnir voru tvær konur. Þið fáið stig fyrir að nefna aðra þeirra, en ef þið eruð með bæði nöfn rétt fáiði sérstakt Doddastig.

4.  Andri Freyr Hilmarsson, Ásgeir Tómas Arnarson, Elva Björg Gunnarsdóttir, Katrín Guðrún Tryggvadóttir, Magnús Orri Arnarson og Steinunn Ása Þorvaldsdóttir eru umsjónarmenn vinsæls sjónvarpsþáttar. Hvað heitir hann?

5.  Bróðir Steinunnar Ásu Þorvaldsdóttur er fótboltaþjálfari í fremstu röð. Hvað heitir hann?

6.  Og hvaða lið þjálfar sá góði maður?

7.  Rithöfundur einn hóf feril sinn með ritun skáldsagna, gerðist svo um langt skeið aðsópsmikill blaðamaður og ritstjóri og skrifaði svo þrjár einkar opinskáar endurminningabækur — Týnd í paradís, Syndafallið og Bréf til mömmu. Hvað heitir höfundurinn?

8.  Í bókunum er m.a. fjallað um uppvöxt höfundarins í tilteknum söfnuði sem bannar blóðgjöf í lækningaskyni og hefði það bann getað haft örlagarík áhrif á líf höfundarins, sem stríddi við nokkurt heilsuleysi í æsku. Hvaða söfnuð er hér um að ræða?

9.  Á ofanverðri 19. öld fann John Stith Pemberton upp á svolitlu sem fljótlega náði miklum vinsældum og hefur haldið þeim fram á þennan dag. Hvað var það?

10.  Kynlífsstellingar bera ýmis nöfn af ýmsum uppruna, en eftir því sem næst verður komist er aðeins ein alþekkt stelling af því tagi kennd við tölu. Hvaða tala er það?

***

Seinni aukaspurning:

En úr hvaða kvikmynd er skjáskotið hér að neðan?

***

Svör við aðalspurningum:

1.  Finnlandi.

2.  Reykjavíkurlistinn.

3.  Hildur Knútsdóttir og Þórdís Gísladóttir.

4.  Með okkar augum.

5.  Óskar Hrafn.

6.  Breiðablik.

7.  Mikael Torfason.

8.  Vottar Jehóva.

9.  Coca Cola.

10.  69.

***

Svör við aukaspurningum:

Efra skjáskotið er úr Metropolis.

Neðra skjáskotið er líka úr Metropolis.