Guðni Bergsson, fyrrverandi formaður KSÍ, veitti villandi upplýsingar í ágúst síðastliðnum þegar hann sagði að KSÍ hefðu ekki borist ábendingar um kynferðisbrot leikmanna íslenska karlalandsliðsins í knattspyrnu. Guðni hafði þá þegar verið upplýstur um ásökun á hendur landsliðsfyrirliðanum Aroni Einari Gunnarssyni og Eggerti Gunnþóri Jónssyn, fyrrverandi landsliðsmanni. Vitneskja var til staðar innan KSÍ um fjórar frásagnir þar sem leikmenn eða starfsmenn sambandsins hefðu beitt kynferðislegu ofbeldi.

Þetta kom fram á fundi úttektarnefndar ÍSÍ sem rannsakaði viðbrögð og málsmeðferð KSÍ vegna kynferðisbrotamála sem tengjast landsliði Íslands og KSÍ. Í málinu sem tengist Aroni og Eggerti fékk Guðni vitneskju um alvarlegt kynferðisofbeldi frá tengdamóður þolanda, sem jafnframt er starfsmaður KSÍ.

Gerðar voru athugsemdir við yfirlýsingar Guðna

Nefndin kemst að þeirri niðurstöðu að auk þessa máls hafi verið vitneskja um þrjú önnur mál þar sem leikmenn eða starfsmenn KSÍ hafi beitt kynbundnu eða kynferðislegu ofbeldi. Því hafi málflutningur Guðna, þegar hann neitaði fyrir að á borði KSÍ væru frásagnir um kynferðislegt ofbeldi í viðtölum í ágúst, stangast á við staðreyndir málsins. Stjórnarfólk, framkvæmdastjóri KSÍ og starfsfólk hafi gert verulegar athugasemdir við þær yfirlýsingar sem Guðni lét frá sér fara.

Nefndin telur að KSÍ hafi brugðist við í þremur af þessum fjórum málum, með því að senda leikmenn heim út landsliðsverkefni eða með því að koma því svo fyrir að starfsmenn störfuðu ekki framar fyrir KSÍ. Alls var um að ræða þrjá landsliðsmenn og tvo starfsmenn en þolendurnir eru fjórir. Þannig hafi ekki fundist vísbendingar um að KSÍ hafi boðið kæranda í máli sem kom til kasta KSÍ í mars 2018 þagnarskyldusamning, eða með einhverjum hætti komið að slíku tilboði.

Nýtti almannatengla vegna ásökunar um heimilisofbeldi

Engu að síður telur nefndin ekki vísbendingar um að í formannstíð Guðna hafi verið beitt þöggun eða að atvik beri einkenni nauðgunarmenningar innan KSÍ. Nefndin gerir hins vegar athugasemd við að Geir Þorsteinsson, fyrrverandi formaður KSÍ, hafi leitað til almannatengils árið 2016 í kjölfar þess að honum bárust upplýsingar um að lögregla hefði verið kölluð á heimili landsliðsmanns vegna grunsemda um heimilisofbeldi.

Það er mat nefndarinnar að þrátt fyrir að konur séu í miklum minnihluta á skrifstofu KSÍ og í stjórn sambandsins sé ekki hægt að draga þær ályktanir að uppi séu aðstæður sem hamli þátttöku kvenna í starfi sambandsins. Hins vegar starfi KSÍ í alþjóðlegu umhverfi sem sé mjög karllægt. KSÍ hafi með virkum hætti beitt sér undanfarin ár til að jafna aðbúnað karla- og kvennalandsliða. Þá hafi verið gripið til fjölmargra aðgerða til að auka hlut kvenna innan knattspyrnuhreyfingarinnar, þá það hafi gengið misjafnlega vel.

Í nefndinni sátu Dr. Hafrún Kristjánsdóttir sálfræðingur, Kjartan Bjarni Björgvinsson héraðsdómari, sem jafnframt var formaður nefndarinnar og Rán Ingvarsdóttir lögfræðingur.