Útbreiðsla kórónuveirunnar í samfélaginu er orðin mikil og eftir því sem tíminn líður verður erfiðara að ná utan um bylgju faraldursins og kveða hana niður. Það er stjórnvalda að taka ákvörðun um til hvort þau séu tilbúin að grípa til harðra aðgerða til að svo megi verða.
Þetta sagði Þórólfur Guðnason á upplýsingafundi almannavarna og landlæknisembættisins í dag. „Ég held að það sé fyllsta ástæða til að hafa áhyggjur af þessari þróun sem við erum að sjá og þá sérstaklega því álagi sem getur skapast á heilbrigðiskerfið okkar,“ sagði Þórólfur. Hann sagðist jafnframt vera í stöðugum samskiptum við heilbrigðisráðherra, formlegum og óformlegum. „Ég held að það sé komið að því að stjórnvöld þurfa að huga vel að því til hvaða aðgera eigi að grípa. Það er ekki víst að ég á þessum tímapunkti leggi til einhverja ákveðnar aðgerðir. Við erum búin að ganga í gegnum þetta margoft, með þeim aðgerðum sem við höfum gripið til, og við vitum hvað virkar og hvað ekki. Ég held að það sé núna stjórnvalda að taka ákvörðun um það, að gefnu áhættumati og útliti, hvort stjórnvöld eru tilbúin til að grípa til harða aðgerða til að kveða bylgjuna hérna niður eða ekki.“
„Ég held að það sé núna stjórnvalda að taka ákvörðun um það, að gefnu áhættumati og útliti, hvort stjórnvöld eru tilbúin til að grípa til harða aðgerða til að kveða bylgjuna hérna niður eða ekki“
Þórólfur lýsti því að honum þætti miður hvernig umræðan um Landspítala, og þær áhyggjur sem stjórnendur þar á bæ hefðu viðrað af álaginu sem á spítalanum væri, hefði verið síðustu daga. Málsmetandi fólk hefði þannig gert lítið úr þeim áhyggjum en enginn væri betur til þess fallin að meta stöðuna en spítalinn sjálfur. Spurður hvort hann hefði lýst þeirri skoðun sinni við stjórnvöld að styrkja þyrfti heilbrigðiskerfið svaraði hann því til að það hefði hann margoft gert. Það yrði hins vegar ekki gert í einu hendingskasti. „Helsta ráðið til að vernda heilbrigðiskerifið og Landspítalann, ef fram fer sem horfir að innlögnum fer að fjölga og alvarlegum veikindum, það er að reyna að minnka útbreiðsluna í samfélaginu. Það er sú leið sem við getum farið núna og gripið hraðast inn í.“
Hafa áhyggjur af afleiðingum helgarinnar
Víðir Reynisson yfirlögregluþjónn sagði að svo virtist sem verslunarmannahelgin hefði gengið stóráfallalaust fyrir sig. Engu að síður hefði verið mikill erill og mikið um hópamyndanir og af því hefðu almannavarnir áhyggjur, í ljósi þess hversu smit væru útbreidd í samfélaginu. Það ætti eftir að koma í ljós hvort að samkomur myndu hafa frekari áhrif á útbreiðslu veirunnar.
Þórólfur benti á að Delta-afbrigði veirunna hefði því sem næst alveg tekið yfir hér á landi og ljóst væri að bólusettir bæði smituðust og smituðu aðra. Útbreiðsla smits í landinu væri mjög hröð og raðgreiningar sýndu að uppruna flestra smitanna mætti rekja til hópamyndunar, til að mynda á skemmtistöðum og hópferðum Íslendinga erlendis.
Í þessari bylgju kórónaveirufaraldursins hafa um 24 þurft að leggjast inn á sjúkrahús, af ríflega 1.470 smitum innanlands frá því í byrjun júlí. Það samsvarar um 1,6 prósentum en í fyrri bylgjum hefur hlutfall þeirra sem hafa þurft á sjúkrahúsinnlögn að halda verið á bilinu 4 til 5 prósent. Um 70 prósent þeirra sem greinst hafa með veiruna frá 1. júlí hafa verið fullbólusettir og af þeim hefur 1 prósent þurft að leggjast inn á sjúkrahús. Hlutfall þeirra sem hafa veikst og þurft á sjúkrahúsinnlögn að halda er hins vegar 2,4 prósent. Þórólfur sagði því ljóst að bólusetning veitti vörn gegn alvarlegum veikindum en ekki væri vitað hversu góða vörn hún veitt til að mynda öldruðum og fólki með undirliggjandi sjúkdóma.
„Þolinmæðin fyrir þessari veiru og fyrir þessum aðgerðum og þessu stóra verkefni okkar er þrotin hjá mjög mörgum“
Um 30 þúsund manns eldri en 16 ára eru nú óbólusettir og um 70 þúsund börn yngri en 16 ára. Stefnt er að því að bjóða börnum á aldrinum 12 til 15 ára bólusetningu á næstu vikum og er unnið að útfærslu á því verkefni.
Boltinn hjá stjórnvöldum
Þórólfur var spurður hvort hann væri hræddur um að smit í samfélaginu væri orðið of útbreitt til að hægt yrði að ná því niður, nema með mjög hörðum viðbrögðum sem lítil stemning væri fyrir í samfélaginu. „Vissulega er rétt að eftir því sem tíminn líður og útbreiðslan verður meiri verður erfiðara að ná utan um þessa bylgju. Því fyrr sem gripið verður til aðgerða því betri árangur næst,“ sagði Þórólfur og bætti því við að þolið í samfélaginu gegn sóttvarnaraðgerðum væri orðið minna en verið hefði. Því riði á að stjórnvöld tækju ákvörðun um hvernig halda skyldi áfram.
„Eins og Þórólfur nefndi þá finnum við það mjög skýrt að þolinmæðin fyrir þessari veiru og fyrir þessum aðgerðum og þessu stóra verkefni okkar er þrotin hjá mjög mörgum. Maður skilur það alveg en því miður er það þannig að við þurfum að halda áfram og það er ekkert annað í stöðunni. Við þurfum ekkert öll að vera sammála um allt en markmiðin okkar þurfa að vera skýr, og það sem meira er að hagsmunir okkar allra fara saman í því að við náum sem bestum tökum á þessari veiru, lifum með henni eins lengi og við þurfum því það er veiran sem er óvinurinnn en ekki við hvert annað. Það skiptir bara miklu máli að sýna mismunundi skoðunum hvers annars skilning, reyna að setja okkur í spor annarra og skilja hvað það er sem býr að baki. Fyrst og fremst þurfum við að vera almennilegt fólk og vera góð hvert við annað,“ sagði Víðir.
Athugasemdir