Íslenska ríkið hefur reitt fram 1,1 milljarð vegna kaupa á bóluefnum við Covid-19. Stærstur hluti kostnaðarins hefur farið í kaup á efnum Pfizer og AstraZeneca. Þetta kemur fram í tölum frá heilbrigðisráðuneytinu. Þó 20 prósent bólusettra hafi fengið bóluefni lyfjafyrirtækisins Janssen er minnstur kostnaður við kaup á því efni. 

Um helmingur skammta þess efnis fékkst að láni frá Svíþjóð. Norðmenn lánuðu Íslendingum svo 16 þúsund skammta af bóluefni AstraZeneca en samtals hafa 112 þúsund slíkir skammtar verið gefnir hér á landi. Ísland á eftir að kaupa skammta í staðinn fyrir þá til að skila til baka. Ólíklegt er að það verði kostnaðarsamt því bóluefnin tvö eru þau ódýrustu sem gefin eru á Íslandi.

Fá skammtinn á klink

Skammturinn af AstraZeneca er langódýrstur þeirra bóluefna sem notuð hafa verið á Íslandi. Samkvæmt tölum frá heilbrigðisráðuneytinu hefur Ísland keypt AstraZeneca skammta fyrir um 35 milljónir króna en 112 þúsund slíkir skammtar hafa verið gefnir. Það þýðir að hver skammtur hefur kostað um það bil 370 krónur. 

Hafa verður í huga að þessir útreikningar byggja á tölum um gefna skammta og heildarkostnað við bólefnakaup. Ráðuneytið segir að trúnaður ríki um samningana sem gerðir voru við lyfjafyrirtækin og hafa þeir ekki fengist afhentir.

Bóluefni Janssen, sem auðveldara er í allri meðhöndlun og krefst eins skammtar en ekki tveggja líkt og hin efnin, hefur verið gefið rúmlega 50 þúsund sinnum. Kostnaðurinn við kaup á efninu nemur þó aðeins 27,5 milljónum. Um helmingur skammtanna er ógreiddur, þar sem þeir fengust að láni frá Svíþjóð, og má því gera ráð fyrir að kostnaðurinn eigi eftir að um það bil tvöfaldast. Að teknu tilliti til þess má finna út að skammturinn af Janssen hafi kostað rúmar þúsund krónur.

Margfaldur munur á efnum

Á hinum enda skalans er bóluefni Moderna. Það er langsamlega dýrasta bóluefnið sem notað er á Íslandi. Tæplega 46 prósent kostnaðar við bóluefnakaup eru vegna þess efnis, eða samtals um 514 milljónir króna. 38 þúsund Moderna-skammtar hafa verið gefnir og má því reikna út að hver þessara skammta hafi kostað tæpar 13.500 krónur. Gefa þarf tvo skammta af efninu til að einstaklingur teljist fullbólusettur og kostar því bólusetning hvers og eins 27 þúsund krónur. Samanborið við Janssen og AstraZeneca er 26 til 37 sinnum dýrara að bólusetja með Moderna.

Pfizer lendir svo mitt á milli. Skammturinn þar virðist kosta rúmar 2.150 krónur. Tveggja skammta er krafist og full bólusetning fæst því á 4.300, miðað við útlagaðan kostnað vegna kaupa á efninu og fjölda gefinna skammta. Samtals hefur íslenska ríkið keypt Pfizer-skammta fyrir 523,6 milljónir króna en langflestir bólusettir Íslendingar, um það bil 130 þúsund einstaklingar, hafa fengið það efni. 

Kaupum ekki mikið meira

Heimildir til kaupa á bóluefnum við Covid-19 eru að klárast. Samþykkt var að verja allt að 1,4 milljörðum króna til verkefnisins en nú er búið að eyða 1,1 milljarði og flestir þeir sem vilja bólusetningu hafa verið bólusettir.

Samkvæmt upplýsingum frá sérfræðingum heilbrigðisráðuneytisins er nú unnið að því að skila skömmtum til Svíþjóðar og Noregs auk þess sem síðustu skipulögðu bólusetningadagarnir eru nú að líða. Til skoðunar er að bjóða börnum allt niður í 12 ára bólusetningu þegar grunnskólar hefjast að nýju í haust en bóluefni Pfizer má nota á svo ung börn. Bólusetning hér á landi hefur hingað til takmarkast við 16 ára og eldri. 

Engu að síður er ekki gert ráð fyrir öðru en að afgangur verði af bóluefnakaupaheimildinni þegar öllu verður aflokið.