***
Fyrri aukaspurning, hver er konan á málverki Alexanders Ivanovs hér að ofan?
***
Aðalspurningar:
1. Á árunum 1977-1979 gaf tónlistarmaður einn út þrjár plötur sem í sameiningu eru gjarnan kallaðar „Berlínar-plöturnar“. Hver var þessi tónlistarmaður?
2. William Frederick Cody hét Bandaríkjamaður nokkur, sem fæddist í Iowa árið 1846 en lést í Denver í Colorado árið 1917, sjötugur að aldri. William Cody var á sínum tíma einn allra frægasti maður í heimi og dáður um víða veröld, þótt afrek hans ýmis séu nú umdeildari en þá. Langflestir þekktu hann þó eingöngu undir gælu- eða viðurnefni. Hvað kallaðist William Cody?
3. Við hvað mun Janet Yellen starfa í náinni framtíð, ef að líkum lætur?
4. Hvað er kraken?
5. Hver er höfuðborg Alsír?
6. Við hvaða listgrein fékkst Helga Bachmann um sína daga?
7. Hvað hét sú evrópska aðalsætt sem öldum saman réði miklum löndum, ekki síst á Spáni og Austurríki?
8. Hver leikstýrði sinni fyrstu kvikmynd árið 1971 og nefndi hana Play Misty for Me?
9. Hver er talin fjölmennasta orrusta sem haldin hefur verið á Íslandi?
10. Og um það bil hvað margir eru taldir hafa barist þar — samtals? Skekkjumörk eru gefin, 200 til eða frá.
***
Síðari aukaspurning:
Hundarnir á myndinni hér að neðan eru af tegund sem kallast saluki, og einnig stundum kallaðir gaselluhundar, Arabíuhundar eða persneskir gráhundar. En eitt er það, sem ævinlega er sagt vera merkilegast við saluki-tegundina. Hvað þá?
***
Svör við aðalspurningum:
1. David Bowie.
2. Buffalo Bill.
3. Fjármálaráðherra Bandaríkjanna.
4. Sæskrímsli. Skrímsli dugar eiginlega ekki eitt og sér, það verður að fylgja sögunni að skrímsli hafist við í sjónum. Dýrið er yfirleitt talið vera einhvers konar kolkrabbi.
5. Alsír, Algeirsborg.
6. Hún var leikkona.
7. Habsborg.
8. Clint Eastwood.
9. Örlygsstaðabardagi.
10. Menn geta reiknað sig upp í 3.000 manns, svo rétt telst vera allt frá 2.800 til 3.200.
***
Svör við aukaspurningum:
Á efri myndinni er María Magdalena við gröf Jesúa frá Nasaret.
Hundategundin saluki er talin vera sú elsta í heimi sem enn er á dögum. Þetta er auðvitað ekki vitað upp á púnkt og prik, en þetta er svona almennt álitið og fylgir ævinlega sögunni um tegundina. Talið er að saluki hundar hafi verið með í för þegar Alexander mikli réðist inn í Indland árið 329 fyrir Krist.
***
Spurningaþrautin
Fyrri grein
271. spurningaþraut: Hvað heitir eyjan á Kollafirði þar sem lundar verpa í stórum stíl, og fleiri spurningar
Næsta grein
Athugasemdir