Hér, já hér, er þrautin frá í gær.
Fyrri aukaspurning:
Hver er sá hinn hnarreisti karl á myndinni hér að ofan?
***
Aðalspurningar:
1. Portúgali einn heitir Salvador Sobral. Hvað hefur hann helst gert sér til frægðar?
2. Með hvaða fótboltaliði spilar Robert Lewandowski?
3. Hvað segir Biblían að Júdas hafi fengið fyrir að svíkja Jesúa frá Nasaret í hendur Rómverja?
4. Kvikmyndin The Deer Hunter frá árinu 1978 fjallar um nokkra bandaríska vinnufélaga sem fara í Víetnam-stríðið og lenda þar í miklum lífsháska og sálarháska. Í handriti myndarinnar var gert ráð fyrir að kærasta eins þeirra yrði algjört smáhlutverk í myndinni, en ung og efnileg leikkona sýndi þvílík tilþrif strax við æfingar að leikstjórinn Michael Cimino stækkaði hlutverkið og leyfði henni að semja sinn eigin texta. Og með svo góðum árangri að hún var tilnefnd til Óskarsverðlauna fyrir vikið. Hver var þessi unga leikkona?
5. Fyrsta íslenska konan sem fékk bókmenntaverðlaun Norðurlandaráðs fékk þau árið 1992 fyrir bókina Meðan nóttin líður. Hvað hét höfundurinn?
6. Hvað heitir stærsta eyjan í Færeyja-klasanum?
7. Hvaða tvö ríki eiga strandlengju að Eyjahafinu?
8. Eins og allir vita, þá er hinn sýnilegi alheimur gerður úr efni. En vísindamenn hafa líka reiknað út að líka sé til svokallað „dökkt efni“ eða „dark matter“, sem enginn veit almennilega hvað er, og ennfremur dularfullt fyrirbrigði sem kallast „dark energy“. Dökka efninu og dökka efninu er mjög erfitt að henda reiður á, en hve stór hluti alheimsins virðist vera „venjulegt efni“ af því tagi sem við skiljum? Nefnið svarið í prósentum, það má muna 5 til eða frá.
9. Hvað heitir höfuðborg Ítalíu?
10. Carl Jung hét maður, svissneskur, sem lést hálfníræður árið 1961. Hver var atvinna hans?
***
Og hér er seinni aukaspurningin:
Í hvaða vinsælu sjónvarpsþáttum lék konan, sem hér sést?
***
Svör við aðalspurningum:
1. Vann Eurovision.
2. Bayern München.
3. Þrjátíu silfurpeninga.
4. Meryl Streep.
5. Fríða Á. Sigurðardóttir.
6. Straumey.
7. Grikkland og Tyrkland.
8. Fimm prósent. Rétt telst því vera allt til og með 10 prósentum.
9. Róm.
10. Sálfræðingur.
***
Svör við aukaspurningum:
Á efri myndinni má sjá hinn unga Franklin Delano Roosevelt árið 1910.
Hann varð síðar forseti Bandaríkjanna, svo sem alkunna er, og stýrði málum landa sinna í síðari heimsstyrjöldinni.
Hér til hliðar má mynd af honum undir lok ævinnar, en hann lést rétt fyrir stríðslok, í apríl 1945.
Þetta mun raunar vera síðasta ljósmyndin sem tekin var af honum. Þetta er lituð svarthvít mynd.
Í rauninni veit enginn hvernig bindið hans var á litinn. Það gæti hafa verið rautt!
***
Seinni aukaspurning:
Hún Sidse Babett Knudsen lék að sjálfsögðu í þáttaröðinni Borgen.
***
Og aftur og að síðustu:
Spurningaþrautin
Fyrri grein
137. spurningaþraut: Tungl, leikrit, höfuðborg, fáni, kvikmynd
Næsta grein
Athugasemdir