Þrautin frá í gærmorgun er hérna.

Fyrri aukaspurning er þessi:

Úr hvaða bíómynd er skjáskotið hér að ofan? Athugið að þótt þetta virðist kannski erfitt, þá er þetta úr mynd sem mjög margir hafa séð og ef þið veltið aðeins vöngum yfir því sem gæti gerst næst, þá finniði örugglega rétta svarið.

***

Aðalspurningar, tíu af öllu tagi.

1.   Hvaða þjóð átti sér fyrir um 500 árum konunginn Atahúalpa? Það má fylgja sögunni að það fór illa fyrir honum.

2.   Hvaða klassískt tónskáld samdi gamanóperuna Rakarinn í Sevilla?

3.   Hvað heitir heiðin sem aka þarf liggi leiðin milli Hveragerðis og Reykjavíkur?

4.   Erlendur Sigtryggsson hét fréttamaður einn sem lengi vann á sama stað undir stjórn Péturs Teitssonar fréttastjóra. Á hvaða fréttastofu var það?

5.   Fyrir hvaða flokk sat Eysteinn Jónsson á þingi hér fyrrum daga?

6.   Árni Páll Árnason heitir tæplega hálfþrítugur tónlistarmaður úr Kópavogi sem hefur meðal annars sent frá sér plötuna Hetjan úr hverfinu. Hann kemur ævinlega fram undir öðru nafni, sem hann valdi sér sjálfur, kannski með tilliti til þess hver er eftirlætis fæðutegund hans. Hvert er þetta listamannsnafn Árna Páls?

7.   Hvað nefnist kvendýr sela?

8.   Guðrún Agnarsdóttir, Sigríður Dúna Kristmundsdóttir og Kristín Halldórsdóttir. Hvað gerðu þær árið 1983?

9.   Af tólf fjölmennustu þéttbýliskjörnum á Íslandi eru átta við Faxaflóa, en fjórir utan hans. Þar er Akureyri fjölmennust en hverjir eru hinir þrír? Í þetta sinn megið gefa ykkur hálft stig ef þið hafið tvo rétta, en heilt stig aðeins ef þið hafið alla þrjá.

10.   Hver varð Miss World árið 1985?

***

Síðari aukaspurning kemur hér.

Hvað er að gerast á þessari frægu (og þó öllu heldur alræmdu) ljósmynd frá 1946? Hér sést aðeins hluti myndinnar.

 ***

Svörin við aðalspurningum:

1.   Inkar í Perú.

2.   Rossini.

3.   Hellisheiði.

4.   Fréttastofu Spaugstofunnar.

5.   Framsóknarflokkinn.

6.   Herra Hnetusmjör.

7.   Urtur. (Að ekki sé minnst á kæpur, skergálur, skerjakollur og skerjálur! Takk Ævar Örn!)

8.   Þær settust á þing sem fyrstu þingkonur Kvennalistans.

9.   Árborg (og jú, það má segja Selfoss), Vestmannaeyjar og Grindavík.

10.   Hólmfríður Karlsdóttir.

***

Svör við aukaspurningum:

Myndin efst er úr Guðföðurnum og sýnir Don Vito Corleone (Marlon Brando) leika sér við barnabarn sitt, sem verður á tímabili skelfingu lostið.

En barnið tekur svo gleði sína og leikur við afa, rétt áður en hann fær slag og deyr í garðinum heima hjá sér.

Hér er annað skjáskot nokkrum sekúndum fyrr.

***

Myndin með seinni aukaspurningunni sýnir gleðina sem greip bandaríska herforingja og frúr þeirra þegar fréttir bárust af vel heppnuðum kjarnorkutilraunum á eyjaklasanum Bikini 1946.

Smáatriðin þarf ekki að vita, en nauðsynlegt að vita að þau eru að skera köku í líki kjarnorkusprengju.

Hér má sjá gleðina betur:

***

Og hér er loks linkur (aftur) á þrautina frá í gær.