Hér er 126. þrautin, er í gær birtist.
Fyrri aukaspurning:
Við hvaða tækifæri er myndin hér að ofan tekin?
***
Aðalspurningar:
1. Hvað hét sá yngri bróðir Donalds Trumps Bandaríkjaforseta sem lést um miðjan þennan mánuð?
2. Hvaða heitir lengsti innfjörðurinn úr Húnaflóa?
3. Hver hefur lengst allra verið forstjóri álversins í Straumsvík?
4. Og meðal annarra orða, hvað kallast málmgrýtið eða setlögin sem ál er nær eingöngu unnið úr? (Efnafræðingur hefur bent mér á að „málmgrýti“ sé vart rétt orð frá fræðilegum sjónarhól, en ég hygg þó að flestir kannist helst við efnið sem málmgrýti, svo ég leyfi því að halda sér.)
5. Hvað heitir söngvari hljómsveitarinnar Geirfuglanna, maður sem einnig er vinsæll leikari við Borgarleikhúsið?
6. Hvað heitir höfuðborg Kína?
7. Hvaða heitir langstærsta stöðuvatn heims? Sumir vilja reyndar ekki kalla það stöðuvatn, heldur innhaf, enda er það salt sem sjórinn.
8. Hver var forsætisráðherra Íslands þegar sótt var um aðild að Evrópusambandinu?
9. Hvers konar vín er kallað „sekt“?
10. Sé ófært yfir Hellisheiði, hvaða veg er þá nærtækt að reyna að keyra í staðinn?
***
Og seinni aukaspurningin:
Þessi kona var einu sinni talin ægilega hættuleg, þótt allt muni víst hafa verið orðum aukið. En hún þurfti þó að gjalda fyrir orðróminn.
***
Þá koma hér svörin:
1. Robert Trump.
2. Hrútafjörður.
3. Rannveig Rist.
4. Báxít.
5. Halldór Gylfason.
6. Bejíng. Mjög rosknu fólki er og heimilt að segja Peking.
7. Kaspíhaf.
8. Jóhanna Sigurðardóttir.
9. Freyðandi hvítvín frá Þýskalandi.
10. Þrengslin.
***
Svar við fyrri aukaspurningu:
Þarna má sjá Charles de Gaulle leiðtoga Frakka leiða göngu eftir Champs Élysées frá Sigurboganum til dómkirkjunnar Notre Dame í París til að fagna við messu frelsun Parísar undan Þjóðverjum í síðari heimsstyrjöld.
Gangan fór fram 25. ágúst 1944.
Nóg er að nefna orðin „frelsun“ og „París“ til að fá rétt!
Hér má sjá aðeins stærri mynd:
***
Svar við seinni aukaspurningu:
Þetta er Mata Hari.
***
Hér er svo loks aftur linkur á þrautina frá í gær!
Spurningaþrautin
Fyrri grein
125. spurningaþraut: Hvað heitir rómverska virkið Vindobona nú á dögum?
Næsta grein
Athugasemdir