Hérna má finna þrautina síðan í gær, gætið að því.
Hér að ofan má sjá mynd nokkra, og fyrri aukaspurning hljóðar svo:
Hvað er að gerast á þessari mynd?
En aðalspurningarnar tíu eru þessar:
1. Nú er sunnudagur, ef mér skjöplast ekki, og vonandi verður hann í alla staði góður. En sunnudagurinn 30. janúar 1972 var svo hörmulegur í borg einni að hann hefur æ síðan verið kallaður „blóðugi sunnudagurinn“. Alls voru 14 manneskjur drepnar og annar eins fjöldi særðist. Í hvaða landi gerðist þetta?
2. Annar „blóðugur sunnudagur“ átti sér stað 22. janúar 1905. Þá stefndi fjölmenn en í alla staði friðsamleg kröfuganga að híbýlum stjórnarherranna í landi einu og það var meira að segja prestur sem gekk fremst í göngu. Herflokkur á vegum stjórnarinnar stöðvaði gönguna með skothríð. Rúmlega 200 létu lífið, hátt í 1.000 særðust og nærri 8.000 voru handteknir. Þessi grimmilega árás stjórnvaldanna þennan „blóðuga sunnudag“ varð til þess að miklar óeirðir brutust út og í raun allsherjar uppreisn er fram í sótti. Stjórnvöldum tókst þó að lokum að brjóta hana á bak aftur. Í hvaða landi gerðist þetta?
3. Þriðji „blóðugi sunnudagurinn“ tengist Íslandi svolítið. Það var 13. janúar 1991 að stjórnvöld í ríki einu réðust með skriðdrekum og hermönnum á íbúa í borg nokkurri, sem höfðu komið saman til að krefjast sjálfstæðis fyrir land sitt. Þar féllu 14 óbreyttir borgarar og rúmlega 700 særðust. Viku síðar var Jón Baldvin Hannibalsson þáverandi utanríkisráðherra Íslands kominn til borgarinnar og lýsti stuðningi Íslendinga við sjálfstæðisviðleitnina. Í hvaða borg varð þessi „blóðugi sunnudagur“.
4. Eins og sjá má hér að ofan áttu allir þessir þrír „blóðugu sunnudagar“ sér stað í janúar-mánuði. Af hverju dregur mánuðurinn janúar nafn sitt - það er að segja að því er flestir telja?
5. Hver er fjölmennasta borg í Evrópu?
6. Tónskáld eitt íslenskt sór sig í sumum verkum sínum svo í ætt þjóðlaga að margir laga að verk eftir tónskáldið séu þjóðlög. Þar má til dæmis nefna „Kall sat undir klöppunum“ og „Það á að gefa börnum brauð“. Tónskáldið samdi líka „Mamma ætlar að sofna“. Hvaða tónskáld var þetta?
7. Hver orti annars ljóðið „Mamma ætlar að sofna“?
8. Árið 1994 hélt rokktónlistarmaður nokkur ókeypis tónleika í Rio de Janeiro í Brasilíu og urðu þeir hinir fjölmennustu af því tagi sem nokkru sinni hafa verið haldnir. Hvorki meira né minna en 3,5 milljón manna mætti til að hlýða á tónlistarmanninn syngja lögin sín frægu. Eins og alltaf er Íslandstenging: Músíkantinn hafði einu sinni verið í hljómsveit með Long John Baldry, sem söng eitt lag inn á „Sumar á Sýrlandi“ plötu Stuðmanna. En hver var þessi gríðarlegi vinsæli tónlistarmaður?
9. Höldum oss við tónlistina: Hver var söngvari hljómsveitarinnar Gasolin'?
10. Gisele Bündchen hélt upp á fertugsafmælið sitt fyrir mánuði, en hún er eitt vinsælasta og launahæsta súpermódel 21. aldar. Henni hefur meðal annars verið þakkað að hið svonefnda „heróín-lúkk“ féll úr tísku um aldamótin síðustu en þá hafði um tíðkast þótt fínt að módel væru grá og guggin eins og þau væru illa haldin af eiturlyfjaneyslu. Gisele Bündchen er aftur á móti geislandi af heilbrigði og hreysti. Hún býr nú í Bandaríkjunum en frá hvaða landi kemur hún?
Og hér er myndin sem fylgir seinni aukaspurningu, hvað heitir þessi jurt?
Þá koma svörin:
1. Norður-Írlandi.
2. Rússlandi.
3. Vilníus í Litháen.
4. Rómverska guðinum Janusi - telja flestir. Sumir halda þó að náttúrugyðjan Júnó hafi gefið mánuðinum nafn sitt.
5. Istanbúl.
6. Jórunn Viðar.
7. Davíð Stefánsson.
8. Rod Stewart.
9. Kim Larsen.
10. Brasilíu.
Hér er, til glöggvunar, mynd af Gisele Bündchen, ef einhver skyldi ekki vita hvernig hún lítur út.
Bündchen er vissulega af þýskum ættum eins og nafn hennar bendir til en fædd í Horizontina í Brasilíu árið 1980.
Það fylgir sögunni að hún sé löngu búin að týna niður þeirri litlu þýsku sem hún mun hafa lært á æskuheimilinu.
Svör við aukaspurningunum tveim:
Á málverkinu á efri myndinni eru rómverskir öldungaráðsmenn að taka Julius Caesar af lífi á fundi í ráðinu 15. mars árið 44 fyrir Krist.
Á neðri myndinni er vatnasóley.
Spurningaþrautin
Fyrri grein
118. spurningaþraut: Hurts 2B Human? Svá fullyrðir söngkona ein, sem hér er spurt um
Næsta grein
Athugasemdir