Hér er þrautin frá í gær.

Fyrri aukaspurning:

Frægur bandarískur arkitekt teiknaði á fjórða áratug 20. aldar þann sumarbústað, sem sést á efri myndinni, fyrir fjölskyldu búðakóngs. Bústaðurinn er kallaður Fallingwater og er talinn eitt af meistaraverkum arkitektúrs á öldinni. Hvað hét arkitektinn?

Sú síðari:

Hver er þessi gretti tónlistarmaður á neðri myndinni?

En aðalspurningar eru þessar:

1.   Rock and Roll Hall of Fame, eða Frægðarsalur rokksins, er safn í Ohio í Bandaríkjunum sem heldur úti lista yfir rokktónlistarmenn (í víðum skilningi) sem þykja hafa afrekað eitthvað sérstakt á sínu sviði. Mjög er eftirsótt að komast á þennan lista. Aðeins ein kona hefur komist tvívegis á listann, fyrst sem félagi í vinsælli hljómsveit en síðan sem sólólistamaður. Hver er þessi kona?

2.   Donald Trump Bandaríkjaforseti á dætur tvær. Sú eldri verður fertug á næsta ári og er uppáhaldsbarn Trumps þessa. Hún hefur undanfarið verið í hlutverki sérstaks ráðgjafa föður síns. Hvað heitir konan?

3.   Yngri dóttir Trumps er aftur á móti 26 ára og hefur fátt fengist við í lífinu nema birta myndir af sér á Instagram ásamt öðru ríku fólki. Hvað heitir hún?

4.   Seint í júní síðastliðnum gaf mjög vinsæl söngkona nánast fyrirvaralaust út hljómplötu á netmiðlum, sem fékk afar góða dóma og þótti marka nýja braut á ferli söngkonunnar. Hún hafði fram að þessu verið kunn fyrir létt og skemmtilegt popp en syngur nú afslappaðar rokkballöður í stíl indírokks. Platan heitir Folklore en hver er söngkonan? 

5.   Sænskur víkingur á að hafa verið einn þeirra fyrstu sem til Íslands komu á miðöldum, hann er sagður hafa siglt umhverfis landið og síðan nefnt það eftir sjálfum sér. Hvað hét þessi hógværi Svíi, að sögn?

6.   Hvaða ríki tilheyra hinar merkilegu Galapagos-eyjar?

7.   Hver er bjartasti liturinn sem sólin gefur frá sér: rauður - órans - gulgrænn - grænblár - eða fjólublár?

8.   Hvað heitir hæsti tindur Íslands?

9.   Hvað heitir konungur Spánar?

10.   Ragnar Freyr Ingvarsson læknir var yfirmaður sérstakrar Covid-19 deildar á Landspítalanum á útmánuðum og fram á vor, þegar deildin var lögð niður af því hennar þótti ekki lengur vera þörf. Ragnar Freyr er líka kunnur fyrir sérstakt áhugamál sitt þar sem hann er kallaður ... hvað?

Svörin við aðalspurningum eru þessi:

1.   Stevie Nicks söngkona Fleetwood Mac.

2.   Ivanka. 

3.   Tiffany.

4.   Taylor Swift.

5.   Garðar Svavarsson.

6.   Ekvador.

7.   Gulgrænn.

8.   Hvannadalshnjúkur.

9.   Filippus eða Felipe. Ekki er þörf að vita að af Filippusum á Spáni er hann númer sex.

10.   Læknirinn í eldhúsinu.

Aukaspurningar:

Arkitektinn hét Frank Lloyd Wright.

Músíkantinn er Ómar Ragnarsson.