Mikil samstaða er meðal flokkanna í borgarstjórn um að byggja upp stíga til að mæta fjölgun hjólreiðafólks. Öll sveitarfélögin á höfuðborgarsvæðinu standa að verkefninu sem mun tengja saman sveitarfélög, innviði þeirra og atvinnusvæði. Borgarfulltrúi Miðflokksins er andvígur því að ríkið veiti borginni pening til uppbyggingar hjólastíga.
Tillaga um uppbyggingu stofnleiða hjólreiða á höfuðborgarsvæðinu næstu 15 ár með fjármagni samgöngusáttmála var kynnt á fundi skipulags- og samgönguráðs í gær. Samgöngusáttmáli ríkis og sveitarfélaga höfuðborgarsvæðisins var undirritaður í lok september 2019 með fjárfestingu upp á 120 milljarða króna á tímabilinu, þar af 8,2 milljarða í göngu- og hjólastíga.
Fjármagnið úr samgöngusáttmálanum fer fyrst og fremst í uppbyggingu á samgöngustígum, sem eru þeir stígar á stofnleiðum sem flytja fólk til og frá vinnu eða skóla. Forgangsröðun uppbyggingarinnar var ákveðin í samráði sveitarfélaganna og Vegagerðarinnar og byggir meðal annars á talningu á fjölda hjólandi í fyrra, uppbyggingu Borgarlínu og markmiðum um að tengja saman þá hjólastíga sem nú þegar eru aðskildir frá gangandi umferð.
„Hjólabúðir borgarinnar standa flestar tómar, biðraðir hafa náð langt út úr dyrum og eftirspurnin hefur aldrei verið meiri“
Fulltrúar Sjálfstæðisflokksins í ráðinu eru jákvæðir gagnvart tillögunni. „Samfélagið hefur óhjákvæmilega tekið breytingum í kjölfar COVID-19 faraldursins,“ segir í bókun fulltrúa flokksins. „Fólk hefur séð jákvæð áhrif þess að ganga eða hjóla um borgarlandið. Göngu- og hjólastígar borgarinnar hafa aldrei verið jafn þétt setnir, hvort sem um er að ræða hjólandi vegfarendur eða gangandi. Þetta sýna talningar borgarinnar glöggt, en vegfarendum hefur fjölgað gífurlega í samanburði við aprílmánuð síðasta árs. Hjólabúðir borgarinnar standa flestar tómar, biðraðir hafa náð langt út úr dyrum og eftirspurnin hefur aldrei verið meiri. Mikilvægt er að styðja við þessa jákvæðu þróun með áframhaldandi uppbyggingu göngu- og hjólastíga í borginni, með áherslu á fjölgun stíga og aðgreiningu gangandi og hjólandi vegfarenda.“
Vigdís Hauksdóttir, borgarfulltrúi Miðflokksins, er áheyrnarfulltrúi í ráðinu. Hún er á móti því að ríkissjóður leggi borginni til fjármagn í þessi verkefni. „Átta þúsund og tvöhundruð milljónir í hjólastíga. Sjá ekki allir peningasóunina? Hvernig má það vera að íslenska ríkið sé að spandera sköttum landsmanna með þessum hætti og í gæluverkefni borgarstjóra og meirihlutans?“ segir í bókun hennar á fundinum.
„En að sækja hjólapeninga í tóman ríkissjóð er dæmalaust“
Gagnrýnir Vigdís sinn fyrrverandi samflokksmann, Sigurð Inga Jóhannsson, samgönguráðherra og formann Framsóknarflokksins. „Meirihlutinn getur/má gera það sem hann vill á meðan hann er við völd,“ lét hún bóka á fundinum. „En að sækja hjólapeninga í tóman ríkissjóð er dæmalaust. Ekki kemur Akureyringurinn, Vestfirðingurinn eða Austfirðingurinn hjólandi til Reykjavíkur að sinna erindum sínum í stjórnsýsluhúsum ríkisins sem búa nú þegar við skert aðgengi sem er á ábyrgð sama meirihluta. Ég spyr á ný – hvað er samgöngumálaráðherra að hugsa?“
Fulltrúar meirihlutar svöruðu bókun Vigdísar í einni setningu: „Vandséð er hvernig uppbygging hjólastíga í Reykjavík skerði lífsgæði Vestfirðinga.“
Athugasemdir