„Ég reyndi að fá hjálp, ég fór oft niður á geðdeild og líka til sálfræðinga,“ segir Elísabet Ólafsdóttir, sem hefur allt frá unglingsaldri glímt við andlega erfiðleika, sjálfshatur á stundum, kvíða og þunglyndi. 

Að hennar sögn má rekja það til ýmissa þátta, baráttu við ofþyngd allt frá unglingsaldri, meðvirkni og mikla þörf fyrir viðurkenningu sem hún upplifði oft og tíðum að hún fengi ekki. 

Síðasta sumar gerðist hins vegar nokkuð sem hefur leitt Elísabetu til þess að beita öðrum aðferðum til að ná jafnvægi í lífinu og hætta að lifa eftir því hvernig aðrir sjá hana.

Vakti athygli með bók í bloggstíl

Einhverjir gætu kannast betur við Elísabetu sem Betu rokk, söngkonuna í hljómsveitinni Á túr, bloggara og höfund fyrstu íslensku bókarinnar sem skrifuð var í blogg-stílnum, Vaknað í Brussel. Elísabet var áberandi í íslensku samfélagi um og upp úr aldamótum en hefur látið fremur lítið fyrir sér fara um …