Ung móðir segist ekki hafa fengið neinn fyrirvara frá Heimavöllum um að blokkin sem hún hefur búið í síðustu fjögur ár hafi verið í söluferli fyrr en hún var seld þann 6. janúar. Á föstudag barst henni bréf frá nýjum eigendum að leigusamningi hennar verði ekki framlengdur og því þurfi hún og fjölskylda hennar að flytja út þann 31. mars. Í samtali við Stundina segist hún búa í óvissuástandi og hrylli við tilhugsunina um að hugsanlega uppræta fjölskyldu sína og flytja í annað sveitarfélag.

Eins og kom fram í fréttum á föstudag seldi leigufélagið Heimavellir húsnæði á Holtsflöt 4 á Akranesi. Alls 18 fjölskyldur, eða 60 manns, sem búa þar munu því enda á leigumarkaði á komandi mánuðum. Þrjár fjölskyldur sem voru með tímabundna leigusamninga munu þurfa að yfirgefa íbúðir sínar eftir tvo mánuði, þann 31. mars.

Húsnæðið var áður í eigu Íbúðalánasjóðs, en í pistli á Facebook segir Vilhjálmur Birgisson, formaður Verkalýðsfélags Akraness, að Heimavellir hafi keypt það á „sérstökum sérkjörum“. Kallaði hann sölu Heimavalla á húsnæðinu „siðlausa“ þar sem leigjendur voru ekki látnir vita með neinum fyrirvara að kringumstæður þeirra gætu breyst, ekki fyrr en salan var gengin í gegn.

Arnar Gauti Reynisson, framkvæmdastjóri Heimavalla, segir félagið hafa uppfyllt sína lagalega skyldu við sölu á þessari eign. „Við erum skráð félag og ég get ekki fjallað um einstök viðskipti félagsins fyrir utan það sem við gefum opinberlega frá okkur,“ segir hann. „Við upplýsum það bara í kauphöllinni þegar svo ber undir.“

Hefur ekki skjól til að leita í

Viðmælandi Stundarinnar er alin og uppkomin á Akranesi þar sem hún vinnur og tvö börn hennar á grunnskólaaldri sækja skóla. Hún segir að hún hafi fengið áðurnefnt bréf frá Heimavöllum þann 6. janúar, en þá hafi hana og fleirum grunað að það stæði til að selja íbúðirnar. „Það kom fljótlega í ljós, enda byrjuðu nýir eigendur strax að gera upp íbúð sem tæmdist um jólin og undirbúa undir sölu.“

„Það eru kannski 50 manns að slást um hverja íbúð sem losnar“

Hún segist strax hafa farið að skoða í kring um sig og leitað að nýju húsnæði en ekki fundið neitt, enda sé staðan á leigumarkaðinum á Akranesi mjög erfið. „Ég er með alla anga úti núna að leita mér að húsnæði, en það er ekkert í boði. Það eru endalausir biðlistar út um allt, og það eru fáar íbúðir sem eru auglýstar. Það eru kannski 50 manns að slást um hverja íbúð sem losnar.“

Hún segir að aðstæður séu ekki þannig að hún geti farið aftur heim til foreldra sinna, þar sem þeir hafi minnkað við sig á eldri árum. „Maður getur ekki farið neitt til að brúa bilið þangað til maður fær eitthvað annað. Það er ekki einu sinni í boði.“

„Það er skelfileg tilhugsun að þurfa að rífa börnin mín upp og flytja í annað sveitarfélag“

Hún segir að ótti sinn hafi ræst í dag þegar hún fékk staðfestingu frá nýjum eigendum húsnæðisins um að leigusamningur hennar verður ekki endurnýjaður, og því sé tímaramminn til að finna nýtt húsnæði á Akranesi ört að minnka. „Það er skelfileg tilhugsun að þurfa að rífa börnin mín upp og flytja í annað sveitarfélag. Að kveðja vinnuna og fjölskylduna sem býr hér. Það er rosalega mikil streita sem fylgir þessu og mikið uppnám. Ég er búin að gráta af hræðslu af því hvað verður, sérstaklega því maður veit að maður hefur ekkert annað endilega til að fá. Óvissan er svo mikil.“