Hannes Hólmsteinn Gissurarson prófessor taldi bækur sínar um Halldór Laxness fram sem rannsóknarframlag til Háskóla Íslands. Frá þessu greinir hann í samræðum við Einar Steingrímsson, stærðfræðiprófessor, á Facebook. Ævisaga nóbelsskáldsins eftir Hannes er í þremur bindum, en í fyrsta bindinu nýtti Hannes sér texta skáldsins lítt breyttan án þess að geta heimilda. Í kjölfarið var hann dæmdur fyrir brot gegn höfundarrétti. 

„Já, ég taldi þær allar fram. Ég birti raunar á hverju ári rannsóknaskýrslu mína hér á Netinu. Á bak við þær allar þrjár liggja mjög miklar og margra ára rannsóknir, þótt ég hafi vissulega í fyrsta bindinu notað texta Laxness í miklu meira mæli en í síðari bindunum (sem helgast ekki síst af því, að það voru oft einu heimildirnar um æsku hans). Ég hefði vissulega átt að skrifa sjálfstæðari texta,“ skrifar hann í svari sínu til Einars Steingrímssonar. 

Háskólakennarar skila árlega inn rannsóknaskýrslu og fá punkta fyrir rannsóknarframlög sín, en punktarnir geta haft áhrif á launaflokk og framgang í starfi.