Þingflokkur Pírata hefur lagt fram frumvarp sem miðar að því að gera upplýsingar fyrirtækjaskrár aðgengilegri almenningi. Lagt er til að gjaldtöku fyrir rafræna uppflettingu í skránni verði hætt.

„Lagt er til að ekki skuli taka gjald fyrir rafræna uppflettingu í fyrirtækjaskrá og að sömu upplýsingar skuli vera aðgengilegar þar og ef greitt væri fyrir eintak af gögnum úr skránni. Til dæmis er nú aðeins hægt að fá upplýsingar um stjórn og ársreikninga félaga með því að greiða fyrir þær og telja verður að þær séu því ekki aðgengilegar almenningi,“ segir í greinargerð frumvarpsins sem lagt var fram á Alþingi í dag.

Hér má sjá frumvarpið í heild en flutningsmenn eru þingmenn Pírata, þau Björn Leví Gunnarsson, Ásta Guðrún Helgadóttir, Birgitta Jónsdóttir, Einar Brynjólfsson, Gunnar I. Guðmundsson, Halldóra Mogensen, Jón Þór Ólafsson, Smári McCarthy, Viktor Orri Valgarðsson, Þórhildur Sunna Ævarsdóttir.