Um þrjú hundruð börn eru enn á biðlista hjá Reykjavíkurborg eftir plássi á frístundaheimili. Flest þeirra búa í Norðlingaholti en 80 börn eru á biðlista í Klapparholti. Í Vesturbæ Reykjavíkur bíða um sextíu börn enn eftir að komast að í Frostheimum. Þá eru um fimmtíu börn á biðlista Sólbúa við Breiðagerðisskóla.
Afar erfiðlega hefur reynst að fá starfsfólk í Guluhlíð og Öskju, sem er frístundaþjónusta fyrir börn og unglinga í Klettaskóla. Þar var brugðið á það ráð að bjóða hlutavistun. Í Öskju fá börn nú vistun þrjá daga í viku en börnin í Guluhlíð aðeins í 2–3 daga.
Reykjavíkurborg hefur borist 4.600 umsóknir um frístundaheimili þetta árið. Á sama tíma í fyrra voru umsóknir í heild 4.400. Þeim fjölgaði um 600 frá því að skóli hófst 22. ágúst. Soffía Pálsdóttir, yfirmaður frístundamiðstöðva og tengdrar þjónustu hjá Reykjavíkurborg, segir að þetta sé hluti vandans. Margir hafi sótt seint um og erfitt hafi reynst að leggja mat á þörfina. „Það saxast lítið á biðlistann þegar bætist alltaf við umsóknir,” segir hún en tekur þó undir að að öll grunnskólabörn ættu að geta gengið að plássi sem vísu. „Um 98 prósent barna í 1. og 2. bekk eru í vistun hjá okkur. Barn sem er ekki í frístund hefur engan til að leika við þegar heim er komið, þannig að auðvitað ættum við að gera ráð fyrir öllum börnum og gerum það í fjárhagsáætlun. En við erum í harðri samkeppni um starfsfólk.”
Athugasemdir