Myndband þar sem sjá má ísraelskan landamæravörð hrinda hreyfihömluðum palestínskum manni í hjólastól í götuna hefur vakið mikla athygli á samfélagsmiðlum. Atvikið átti sér stað við landamærastöð á hernumdu svæðunum í borginni Hebron fyrr í mánuðinum, stuttu eftir að ísraelskir hermenn höfðu skotið tuttugu ára gamla palestínska konu, sem sökuð var um að hafa reynt að stinga ísraelskan lögreglumann. Sjónarvottar segja að maðurinn í hjólastólnum hafi ætlað að nálgast konuna í þeim tilgangi að hjúkra henni. Samkvæmt ísraleska fjölmiðlinum Haaretz er ekkert vitað um ástand mannsins. Yfirvöld í Ísrael hafa gefið það út að þau hafi atvikið nú til rannsóknar.