Björn Ingi Hrafnsson er á skömmum tíma orðinn einn áhrifamesti fjölmiðlamaður Íslands. Undir hann heyra miðlarnir DV, Pressan, Eyjan og Bleikt.is. Þá er hann umsjónarmaður vikulegs sjónvarpsþáttar í opinni dagskrá á Stöð 2 sem einnig er sýndur á Vísi.is. Áhrifavald Björns Inga hefur farið stigvaxandi undanfarin ár og ítök hans á fjölmiðlamarkaði hafa aldrei verið meiri. Þau náðu hámarki með yfirtökunni á DV í fyrra, en um hana er enn ótal spurningum ósvarað.

Uppfært: 25. júlí, eftir að greinin var skrifuð, var tilkynnt að Björn Ingi og Vefpressan hefðu keypt 12 blöð til viðbótar. Þar á meðal eru: Akureyri Vikublað, Reykjavík Vikublað, Bæjarblaðið Kópavogur, Bæjarblaðið Hafnarfjörður/Garðabær, Reykjanesblaðið, Selfossblaðið, Vesturlandsblaðið, Austurland og Vestfirðir.

Björn Ingi hefur komið víða við og trekk í trekk þurft að reiða sig á vinskap og tengsl við fjársterka menn. Félagar hans lýsa honum sem vini vina sinna og stórum manni með stórt hjarta. Hann er fjölmiðlakóngur, athafnamaður, fjölskyldufaðir og klækjarefur. Saga hans er skrautleg og verður skrautlegri með hverju árinu sem líður. En hver er maðurinn og hvernig varð hann svona áhrifamikill?

Maður á uppleið

Björn Ingi kom í heiminn þann 5. ágúst árið 1973 og ólst upp í Hveragerði og á Flateyri. Blaðamennskuáhuginn vaknaði snemma. Ellefu ára að aldri fékk hann að kíkja í heimsókn á ritstjórn Morgunblaðsins og sagðist þá ákveðinn í að verða blaðamaður. Þetta átti eftir að rætast rúmlega áratugi seinna.

Á þessum tíma bjó fjölskyldan í húsinu Sólvöllum á Flateyri. Stórhuga faðir hans, Hrafn Björnsson, kom sér upp bátasmiðju í lýsistanki gamallar hvalverksmiðju í bænum. Reksturinn gekk hins vegar ekki sem skyldi og athygli vakti þegar fjölskyldan hvarf snögglega frá Flateyri og flutti suður á bóginn.

Björn Ingi varði framhaldsskólaárunum í Reykjavík sem nemandi við Menntaskólann við Hamrahlíð. Þaðan lá leiðin í háskólann þar sem Björn Ingi lagði stund á BA-nám í sagnfræði og stjórnmálafræði, án þess þó að ljúka gráðu. Hann tók virkan þátt í félagsstörfum sem formaður félags sagnfræðinema og gjaldkeri Röskvu og byggði upp öflugt tengslanet. „Hann klæddi sig vel og virtist mjög upptekinn af því að líta út fyrir að vera maður á uppleið, maður með völd og áhrif,“ segir einn af viðmælendum Stundarinnar sem þekkti Björn Inga á þessum árum. „Hann montaði sig af því að hann léti þvo og strauja skyrturnar sínar á þvottahúsi.“

Varla tími til að borða

Á þrítugsaldri starfaði hann sem upplýsingafulltrúi Sambíóanna og blaðamaður á Morgunblaðinu. Þótti hann standa sig með mikilli prýði og af