Erlendir verkamenn frá Póllandi, flestir farandverkamenn sem hingað komu til lands í apríl til þess að starfa fyrir Icelandair Ground Services, dótturfélag Icelandair, greiða 69.000 krónur fyrir 8 fermetra herbergi á Ásbrú í Reykjanesbæ. Fyrir utan þessa átta fermetra er sameiginlegt baðherbergi og sameiginlegt eldhús auk þess sem fataskápur, rúmlega fermeter, fylgir hverju herbergi.

Leigan er tekin af launum verkamannanna enda eru eigendur fjölbýlishúsanna þeir sömu og veita þeim atvinnu.

Herbergin er að finna í tveimur fjölbýlishúsum sem IGS keypti nýverið af Kadeco, Þróunarfélagi Keflavíkurflugvallar, sem bandarískir hermenn bjuggu í hér á árum áður en þá voru aðeins 37 herbergi í hverju fjölbýlishúsi.

Með breytingum IGS var herbergjunum fjölgað um helming eða í 74 herbergi og eru bæði fjölbýlishúsin orðin full en samkvæmt heimildum Stundarinnar eru menn nú að skoða hvort kaupa þurfi ekki þriðja fjölbýlishúsið.

„Þetta er engin frétt,“ sagði Kristján við blaðamann. Hann sagðist hafa farið sjálfur og skoðað húsakostinn og hafi vitað til þess að leigan væri í kring um sextíu þúsund krónur fyrir herbergið.

Íslendingar greiða miklu lægri leigu á sama svæði

Aðeins nokkrum metrum frá leigja Íslendingar svipuð herbergi, í öðru fjölbýlishúsi, en þau eru töluvert stærri og leigan töluvert lægri. Þannig greiða Íslendingar 72.000 krónur fyrir 55 fermetra þar sem þeir hafa sérbaðherbergi og séreldhús. Þannig er fermetraverð Íslendinganna rúmar 1300 krónur á meðan fermetraverð erlendu verkamannanna er rúmlega 8.000 krónur. Slíkt leiguverð á fermetra, um og yfir átta þúsund krónur á fermetra, er með því hæsta sem finnst á Íslandi, ef ekki það hæsta.

Þá býðst Íslendingunum að fá húsaleigubætur vegna leigu á Ásbrú en það býðst ekki verkamönnunum vegna þess, meðal annars, að þetta eru aðeins herbergi en ekki samþykktar íbúðir.

Formaður verkalýðsfélagsins skoðaði aðstæður

Samkvæmt heimildum Stundarinnar greiða langflestir þessara verkamanna til Verkalýðs- og sjómannafélags Keflavíkur en því stjórnar formaðurinn Kristján Gunnarsson. Blaðamaður Stundarinnar hafði samband við Kristján og bar undir hann háa húsaleigu en þá sagði hann málið blásið upp.

 „Við höfum eftirlit með því hvort ekki sé verið að fara eftir kjarasamningum. Hafðu bara samband við heilbrigðiseftirlitið eða Vinnueftirlitið. Þeir eru búnir að taka þetta allt út og samþykkja.“

„Þetta er engin frétt,“ sagði Kristján við blaðamann. Hann sagðist hafa farið sjálfur og skoðað húsakostinn og hafi vitað til þess að leigan væri í kring um sextíu þúsund krónur fyrir herbergið.

Sagði blaðamann vera að blása málið upp

„Þetta er ekkert að gerast í fyrsta sinn. Hingað til lands koma verkamenn sem dvelja í verbúðum og húsnæði eins og gengur og gerist. Þeir eru að vinna samkvæmt íslenskum kjarasamningum og greiða skatta hér á landi. Það sem er ekki vanalegt við þetta er að þeir eru uppi á Ásbrú,“ sagði Kristján.