Það ríkir húsnæðisskortur. Á þessu ári hækkaði leiga um 13% og hefur á síðustu árum hækkað um tugi prósenta árlega. Því miður eru ekki bara réttindi leigjenda á Íslandi ótrygg heldur er kostnaður þeirra af húsnæði sínu mun hærri en annars staðar í Evrópu. En skorturinn hefur ekki bara áhrif á leigjendur. Hann hefur áhrif á alla Íslendinga sem eru að leita sér að húsnæði. Ástandið er því grafalvarlegt.

Í samtali visir.is við varaformann Viðreisnar, Jónu Sólveigu Elínardóttur hélt hún því fram að Sjálfstæðismenn hefðu vísvitandi búið til húsnæðisskort á höfuðborgarsvæðinu. Hún sagði orðrétt:

„Sjálfstæðismenn hafa bara ekki viljað tala við Dag B. Eggertsson, borgarstjóra Samfylkingarinnar. Þess vegna hefur ekki verið ráðist í nauðsynlega uppbyggingu á íbúðarhúsnæði á höfuðborgarsvæðinu. Þess vegna hefur ekki verið hægt að úthluta þessum lóðum til borgarinnar.“

Þetta mál er grafalvarlegt, en samkvæmt þessu eru flokkspólitískir hagsmunir teknir fram yfir þjóðarhag. Það væri svo sem ekki í fyrsta sinn, en nú eru ótal Íslendingar sem finna þetta á eigin skinni.

Píratar í borgarstjórn hafa fordæmt þessi vinnubrögð og vilja svör. Væntanlega munu Sjálfstæðismenn ekki sitja undir þessu þegjandi og koma með skýr og góð svör gegn þessum ásökunum frá fyrrum samstarfsfélaga þeirra í stjórn. Ef einhver hefur tekið þá ákvörðun að tefja fyrir uppbyggingu í borginni þurfum við að vita hver.

Borgarbúar á leigumarkaði og heimilislausir bíða spenntir. Var þeirra hagsmunum fórnað til að ná ódýru höggi á Reykjavíkurborg?