Þessi færsla er meira en 10 ára gömul.
Fá þau þá að greiða 5% lægri leigu og skatta?
Mér blöskrar að 18 og 19 ára einstaklingar eigi að fá 5% lægra kaup en aðrir í nýjum kjarasamningum. Þeir sem semja um þetta eru greinilega miðaldra líkt og þeir sem semja lögin í landinu, og hér um bil allt sem samið verður um. Eflaust hugsar þetta fólk til unglinganna heima hjá sér, börnin þeirra eru jú bara í menntaskóla og borga ekkert heim, vinnan þeirra bara aukavinna til að borga fyrir djamm og ferðalög.
Það eru þó ekki allir svo heppnir. Sumir hafa ekki foreldra sem leyfa þeim að búa heima hjá sér frítt, sumir hafa misst fjölskyldu sína eða hrakist að heiman út af erfiðum aðstæðum. Þetta unga fólk þarf að borga leigu, skatta, mat og það þarf líka að spara til að koma undir sér fótum.
En jafnvel þótt mörg ungmenni búi heima hjá foreldrum og séu bara í hlutastarfi þá er það varla ástæða til að mismuna þeim. Ef það á að verðlauna fyrir reynslu þá er það sjálfsagt mál, væntanlega eru kjarasamningarnir með einhverja umbun fyrir að hafa unnið lengi hjá sama fyrirtæki. Það er því ekki hægt að snúa út úr og láta eins og þessir samningar séu ekki að refsa fyrir aldur. Því þetta er álíka mismunun og ef það hefði verið bundið í samninga að laun væru 5% lægri fyrir kynþátt, kyn eða lífsskoðun.
Og hana nú.
Athugasemdir