Ég er að reyna að fella tár vegna harmakveina grátkórs ferðaþjónustunnar.

En það hefur reynst mér mjög erfitt.

Ég get ekki fellt tár í meðvirkni með ferðaþjónustunni sem getur ekki boðið starfsfólki sínu mannsæmandi laun sem duga fyrir framfærslu.

Ég get ekki fellt tár í meðvirkni með ferðaþjónustunni sem fer illa með erlent starfsfólk sitt, rænir af þeim launum og heldur þeim í þrælavist.

Ég get ekki fellt tár í meðvirkni með ferðaþjónustunni sem okrar á ferðamönnum og missir sig í græðginni með t.d. vatnsflöskusölu fyrir mörg hundruð krónur.

Ég get ekki fellt tár í meðvirkni með ferðaþjónustunni sem tuddast dólgslega áfram gagnvart íbúum miðborgarinnar og segir hrokafullt að þeir geti bara flutt ef þeir eru ósáttir við að rúturnar séu brunandi í gegnum íbuðarhverfin um miðjar nætur og keyrandi utan í hús jafnvel.

Ég get ekki fellt tár í meðvirkni með ferðaþjónustunni sem kemur fram af hroka gagnvart öðrum Íslendingum þegar þeim finnst yfirgangur hennar orðinn fullmikill og segir að þeir eigi nú ekki að vera að tala greinina niður.

 Ég get ekki fellt tár í meðvirkni með ferðaþjónustunni sem svíkur stórt undan skatti, greiðir ekki launatengd gjöld og frekjast svo áfram um að aðrir skattborgarar eigi að borga allskonar fyrir hana.

Ég get ekki fellt tár í meðvirkni með ferðaþjónustunni sem getur greitt hundruðu milljóna og einhverja milljarða í arð til eigenda sinna á meðan hún kveinkar sér undan því að allt fari til helvítis ef hún þurfi að greiða hófleg gjöld til samfélagsins og  starfsmönnum sínum mannsæmandi laun.

Ég get ekki fellt tár í meðvirkni með ferðaþjónustunni sem vill ekkert fé vill leggja til uppbyggingar ferðamannastaða heldur frekjast áfram um að hið opinbera og landeigendur eigi að axla þann kostnað.

Ég get ekki fellt tár í meðvirkni með ferðaþjónustunni sem segir ferðamönnum að þeir megi haga sér að vild í náttúrunni og ætlast svo til að hið opinbera siði rangt upplýsta ferðamennina til.

Ég get ekki fellt tár í meðvirkni með ferðaþjónustunni sem sendir ferðamenn út um allar trissur í kúkakamperum sem parkerað er upp við vinnustaði og heimili fólks með tilheyrandi ónæði.

Ég get ekki fellt tár í meðvirkni með ferðaþjónustunni sem svindlar með akstursmæla bíla og hirða ekki um viðhald þeirra þannig að hætta getur stafað af.

Ég get ekki fellt tár í meðvirkni með ferðaþjónustunni sem hefur keyrt upp húsnæðis- og leiguverð með öllu sínu airbnb og hótelbyggingum sem hefðu sumar hverjar betur farið undir ódýrt íbúðarhúsnæði fyrir láglaunafólkið sem vinnur hjá ferðaþjónustunni.

Ég get ekki fellt tár í meðvirkni með ferðaþjónustunni sem skapað hefur hér versta flugfélag heims sem rambar á barmi gjaldþrots vegna óstjórnar sem gæti bitnað fjárhagslega á almenningi.

Ég get ekki fellt tár í meðvirkni með ferðaþjónustunni sem kemur fram í fjölmiðlum og segir að verkföll muni skaða orðspor ferðaþjónustunnar ólíkt græðginni, frekjunni, yfirlætinu, þrælahaldinu, mannfyrirlitningunni, skattsvikunum, slæmri umgengni og framferði gagnvart náttúrunni sem við fáum reglulega fréttir af.

Ég get ekki fellt tár í meðvirkni með ferðaþjónustunni meðan aðilar þar halda uppi harmakveini grátkórs í falsdúr um að allt sé öðrum að kenna meðan þeir og samtök þeirra gera ekkert í því að taka á sjálfsköpuðum löstum ferðaþjónustunnar sem hafa gert hana illa þokkaða.

En ég skal fella tár með öllum þeim sem hafa orðið fyrir barðinu á hennar löstum hvort sem það eru almennir borgarar, illa launað starfsfólk, ferðamenn, opinberir starfsmenn, opinberar stofnanir, sveitarfélög og skattgreiðendur.

Þangað til ferðaþjónustan tekur sér tak, byrjar að greiða starfsfólki mannsæmandi laun og kemur sínum sjálfssprottnu löstum í lag þá fær hún engin tár eða samúð frá mér.

Sérstaklega meðan hennar falski grátkór yfirgnæfir allt.