Í fimmtán ár hefur komið út hefti í Vestmannaeyjum, fyrir Þjóðhátíð, sem ber heitið Þroskahefti. Formaður Þroskahjálpar undrast nafngiftina og segir hana niðurlægjandi.

Bræðrafélagið Vinir Ketils bónda stendur fyrir útgáfu ritsins. Samkvæmt ritstjóranum, Helga Ólafssyni, er það „gleðirit“. Heftið er borið út vikuna fyrir Þjóðhátíð í öll heimahús í Vestmannaeyjum sem og í helstu verslanir og á veitingastaði.

Félagið virðist meðvitað um að nafngiftin stuði fólk. „Einhvern tíma, meðan fyrsta ritið veltist um í undarlegum hugarheimi áðurnefndra drengja, fæddist nafnið sem fylgt hefur því æ síðan. Nafn sem einhverjir hafa haft orð á að þeim þyki stuðandi en okkur hefur þótt hæfa ritinu vel,“ segir í leiðara ritstjóra.

„Þetta er mjög niðurlægjandi“

Bryndís Snæbjörnsdóttir, formaður Þroskahjálpar, segist vera undrandi að slíkt skuli viðgangast. Hún segir fólk með þroskahömlun ekki vilja nota orðið og í gegnum tíðina hafi það verið notað í niðrandi tilgangi. „Þetta er mjög niðurlægjandi,“ segir hún.