Ítrekað hefur verið farið fram á að grein Gísla Gunn­ars­sonar, pró­fess­ors emeritus í sagn­fræði við Háskóla Íslands, um gyð­inga­of­sóknir á Vís­inda­vef Háskóla Íslands verði fjar­lægð. Gísli greindi frá því í gær­kvöld á Facebooksíðu sinni að honum hefði hinn sama dag borist fyr­ir­spurn frá rit­stjórn Vís­inda­vefs­ins um skoðun hans á kröfu þess efnis. Það mun ekki vera í fyrsta skipti, að sögn Gísla.

Greinin, eða svarið, sem um ræðir ber heitið Hvers vegna hafa Gyðingar verið ofsóttir í gegnum ald­irnar? Var greinin skrifuð sem svar við umræddri spurn­ingu og birt árið 2001. Í umræðum á síðu Gísla kemur fram að hann hafi áður fengið kvart­anir yfir umræddri grein en aldrei hafi fylgt með rök­stuðn­ingur sem hafi dugað til þess að hún væri fjar­lægð eða henni breytt. Með beiðn­inni nú hafi eng­inn rök­stuðn­ingur fylgt.

Sú sem krefst þess að greinin verði fjar­lægð nú heiti Merill Kaplan, upp­lýsir Gísli, og er aðstoð­ar­pró­fessor í ger­mönskum og nor­rænum fræðum við Ohio Uni­versity. Í bréfi hennar þar sem farið er fram á að greinin verði fjar­lægð kemur fram að hún hafi áður farið fram á það. Gísli upp­lýsir jafn­framt að hann hafi óskað raka fyrir kröf­unni og bíði þeirra nú.

Miklar umræður hafa skap­ast um málið á síðu Gísla. Töluvert púður fer í karp um zíonisma og gyð­ing­dóm almennt en einnig er rætt um akademískt frelsi og vinnu­brögð. Þannig lýsir Hannes Hólm­steinn Giss­ur­ar­son, pró­fessor í stjórn­mála­fræði, þeirri skoðun að aðal­at­riði málsin sé að Gísli skuli hafa frelsi til að láta í ljósi rök­studda skoðun sína og það frelsi megi Háskóli Íslands ekki af honum taka. Gísli seg­ist þessu sam­mála. „Sammála. Enda kom erindi rit­stjórnar mér mjög á óvart, fyrri til­raunum var svarað strax með form­legri neitun en ég lát­inn vita,“ skrifar Gísli.

Samkvæmt upp­lýs­ingum frá Vís­inda­vefnum eru það hefð­bundin vinnu­brögð þegar kvartað er yfir greinum sem þar er að finna, eða við þær gerðar athuga­semdir, að hafa sam­band við grein­ar­höf­unda og láta þeim eftir að taka ákvarð­anir um við­brögð, þó í sam­starfi við rit­stjórn vefs­ins. Þau vinnu­brögð hafi verið við­höfð í þessu til­viki.