Björn Ingi Hrafnsson, aðaleigandi Pressunnar og DV, sem á síðustu tveimur árum hefur keypt upp tugi fjölmiðla, var nýverið boðaður fyrir Héraðsdóm Reykjavíkur vegna skuldar við ráðgjafafyrirtæki sem reynir að fá greitt fyrir vinnu sína við hús Björns Inga.
Björn Ingi hefur ekki staðið í skilum við ráðgjafafyrirtækið Verksýn fyrir undirbúningsvinnu vegna viðgerða á húsnæði hans í Grafarholti og nam kostnaðurinn um 700 þúsund krónum. Björn Ingi segir í samtali við Stundina að honum þyki málið ekki fréttnæmt og segist telja óeðlilegt að fjallað sé um persónuleg fjármál hans.
Uppfært: Eftir eftirgrennslan Stundarinnar um málið hefur Björn Ingi greitt kröfuna og var hún greidd að fullu fyrr í dag.
Fjárfestar, sem boðað hafði verið að koma ættu að hlutafjáraukninginu í fjölmiðlaveldi Björns Inga, bökkuðu nýverið út úr hlutafjáraukningunni á grundvelli þess að staða félaganna væri mun verri en gefið hefði verið upp. Þá hefur kaupum á stærstu tímaritaútgáfu landsins verið rift vegna „fyrirsjáanlegra vanefnda“.
Greiðslan sem Björn Ingi skuldar er tilkomin vegna skoðunar, minnisblaðs, kostnaðaráætlun og hönnunar- og teiknivinnu arkitekts sem unnin var á tímabilinu frá ágúst til nóvember í fyrra. Í janúar síðastliðnum fór krafan í lögfræðiinnheimtu og endaði því næst hjá héraðsdómi. Þann 30. maí var málið dómtekið og nú er beðið eftir undirritun á stefnuna svo sækja megi kröfuna með aðför.
Lögfræðingur Björns Inga mætti í tvígang og bað um frest vegna málsins en þegar taka átti málið fyrir var enginn á vegum Björns Inga viðstaddur. Féll því svokallaður útivistardómur sem felur í sér að mál er dæmt í fjarveru stefnda og kröfur stefnanda teknar til greina, ef þær eru samkvæmt lögum.
Þykir óeðlilegt að fjallað sé um einkafjármál sín
Uppfært: Hróbjartur Jónatansson hæstaréttarlögmaður hefur staðfest fyrir hönd Jónatansson og Co Lögfræðistofu að samkomulag hafi verið gert í máli Björns Inga og lögfræðistofunnar fyrir hönd Verksýn. Þá hafi skuldin verið að fullu greidd.
Stundin leitaði svara vegna málsins hjá Birni Inga sem vildi ekki tjá sig um það. „Stundin hefur áður fjallað um mín persónulegu fjármál og gerir það ítrekað og það verður bara að hafa það. Ég get ekki haft stjórn á því hvernig innræti ykkar er,“ segir Björn Ingi. Þá sagði hann að í þeim fjölmiðlum sem hann gæfi út væri ekki fjallað um einkafjármál fólks með þessum hætti.
Skömmu eftir samtal blaðamanns við Björn Inga barst tölvupóstur frá Birni Inga þar sem fram kom að samið hefði verið um fyrirkomulag greiðslu og að lögfræðistofa Verksýnar gæti staðfest það. Stundin hafði samband við lögfræðistofuna sem kannaðist ekki við að samið hefði verið í málinu. Þá hafði Stundin samband við Reyni Kristjánsson, framkvæmdastjóra Verksýnar. „Hann hefur ekki haft samband við mig. Þá liggur fyrirkomulag greiðslunnar fyrir í dóminum og ekkert sem að semja þarf um,“ segir Reynir.
Farið var fram á nauðungaruppboð hjá Birni Inga
Fyrr á árinu fjallaði Stundin um að farið hefði verið fram á nauðungaruppboð hjá Birni Inga á mikið veðsettu húsi hans. Það var gert aðeins mánuði eftir að tilkynnt var að Björn Ingi, væri að kaupa stærstu tímaritaútgáfu landsins. Vegna fyrirsjáanlegra vanefnda á greiðslu kaupverðs og slæmrar fjárhagsstöðu Pressunnar ehf. var kaupum á tímaritaútgáfunni Birtíngi hins vegar síðar rift.
Birni Inga þótti óðlilegt að Stundin fjallaði um boðun á nauðungaruppboði á eign hans. „Langflest nauðungaruppboð sem eru auglýst verða ekki að veruleika. Þetta er bara eins og ákveðinn frestur, það bara gefur auga leið. Það er ekkert lengur í þessu máli,“ sagði Björn Ingi.
Björn Ingi er skráður til heimilis á eigninni í Þjóðskrá ásamt eiginkonu sinni. Boðun á nauðungaruppboðinu var auglýst í Lögbirtingablaðinu.
Sagði starfsmenn vera á of háum launum
Greint var frá því í maí að hópur fjárfesta, sem boðað hafði verið að kæmu að Pressunni, hefðu flestir hætt við að leggja 300 milljónir króna til fyrirtækisins. Ástæðan væri, samkvæmt frétt Kjarnans, að mun verri fjárhagsstaða væri á félögunum sem Björn Ingi leiðir, heldur en gefið hefði verið til kynna.
Í frétt Kjarnans kom fram að fjárfestarnir höfðu áður lánað umtalsverða fjármuni til að greiða opinber gjöld sem voru í vanskilum til að koma í veg fyrir að tollstjóri myndi innsigla félög sem tilheyra samsðunni. Alls voru skuldir samstæðunnar taldar nema um 700 milljónum króna. Þar af skuldaði félagið um 300 milljónir í lífeyrissjóði, stéttarfélög og opinber gjöld, svokölluð rimlagjöld.
Fyrr á árinu greindi Fréttablaðið frá því að stéttarfélagið VR hefði krafist þess að útgáfufélag DV væri tekið til gjaldþrotaskipta vegna vangoldinna launa félagsmanns þess. Í viðtali við Fréttablaðið sagði fyrrverandi auglýsingasölumaður á DV að auk þess sem hann ætti kröfu upp á milljón á félagið hefðu meðlagsgreiðslur verið dregnar af launum hans en þeim síðan haldið eftir. Lífeyrissjóður verslunarmanna hafði áður gert árangurslaust fjárnám hjá DV vegna þess að lífeyrisgreiðslur sem dregnar voru af starfsmönnum höfðu ekki skilað sér til sjóðsins.
Í maí sendi Björn Ingi bréf til starfsmanna Pressunnar og DV þar sem hann sagði félagið þurfa á hjálp þeirra að halda við að snúa rekstrinum við. Útskýrði hann slæma fjárhagsstöðu félagsins í meðal annars með því að hann greiddi þeim of há laun. „Við erum að greiða starfsfólki okkar hærri laun en gengur og gerist (eða svo er okkur sagt) og kannski höfum við verið of rómantískir að halda úti efnisþáttum sem ekki standa undir sér. Við höfum lagt mikla áherslu á jákvæðan starfsanda og að starfsfólki líði eins og það sé hluti af stórri fjölskyldu.“
Einn tekjuhæsti fjölmiðlamaðurinn
Samkvæmt tekjublaði Frjálsrar verslunar hafði Björn Ingi tæpar 2,4 milljónir króna í mánaðarlaun í fyrra og var þriðji launahæsti fjölmiðlamaður landsins á eftir Davíð Oddssyni, ritstjóra Morgunblaðsins, og Haraldi Johannesen, ritstjóra og framkvæmdastjóra útgáfufélags Morgunblaðsins. Björn Ingi hefur gegnt stöðu útgefanda fjölmiðlafyrirtækis Pressunnar og DV, en tók nýverið einnig við stöðu ritstjóra vefmiðilsins Eyjunnar.
Í tekjublaði DV voru birt laun fleiri stjórnenda Pressusamstæðunnar. Á þeim lista var Davíð Oddsyni efstur allra, en næst komu þeir Steinn Kári Ragnarsson, fyrrverandi framkvæmdastjóri DV, með 2 milljónir á mánuði og Arnar Ægisson, framkvæmdastjóri Pressunnar, með 1,8 milljónir á mánuði. Kolbrún Bergþórsdóttir, ritstjóri DV, er með 1,4 milljónir á mánuði, en samhliða störfum sínum sem ritstjóri DV hefur hún verið fastur álitsgjafi í Kiljunni, bókmenntaþætti á RÚV.
Aðrir starfsmenn samstæðunnar voru ekki á lista yfir tekjuhæstu fjölmiðlamennina.
Samkrull viðskipta, fjölmiðla og stjórnmála
Björn Ingi var til umfjöllunar í rannsóknarskýrslu Alþingis vegna mikilla lántaka hjá bönkunum fyrir hrun og hagsmunaáreksturs þeim tengdum. Hann var sá fjölmiðlamaður sem mesta fyrirgreiðslu hafði fengið hjá bönkunum. Félag hans fékk kúlulán hjá Kaupþingi til að kaupa hlutabréf í Kaupþingi, Exista, Bakkavör og Spron. Skuldir félagins voru orðnar yfir hálfur milljarður króna.
Hann var aðstoðarmaður forsætisráðherra þegar hann fékk hluta af þeim lánum sem hann útvegaði. Kaupþing veitti honum 60 milljóna króna kúlulán til kaupa á hlutabréfum í bankanum, eingöngu með veði í bréfunum sjálfum. Síðar var hann ritstjóri viðskiptablaðsins Markaðarins á sama tíma og hann fékk lán til kaupa á hlutabréfum í Exista. Hlutabréfaviðskiptin í gegnum Kaupþing héldu áfram meðan Björn Ingi starfaði á Fréttablaðinu og skrifaði um málefni bankans. Félag hans, Caramba ehf, var úrskurðað gjaldþrota í september 2011. Sjálfur hlaut hann 100 milljóna króna lán.
Björn Ingi steig til hliðar sem ritstjóri Pressunnar þegar fyrirgreiðsla hans hjá bönkunum samhliða störfum hans í stjórnmálum og fjölmiðlum komst í hámæli. „Hér er ekkert ólöglegt á ferðinni,“ sagði hann í yfirlýsingu í apríl 2010. Hann lýsti því að hann hefði tapað öllu. „Við hjónin töpuðum öllum okkar sparnaði og miklu meira en það í hruninu.“
Þá hafði hann þegar stofnað vefmiðilinn Pressuna.is. Fjármögnun hennar kom að hluta til frá VÍS, sem var í eigu Exista, sem aftur var í eigu Lýðs og Ágústs Guðmundssona.
Athugasemdir